உத்தரபிரதேச சிவில் சர்வீசஸ் தேர்வு வினாத்தாள் வெளியானதால் பரபரப்பு; ரூ.5 லட்சத்துக்கு விற்கப்பட்டதாக தகவல்:

உத்தரபிரதேச மாநில சிவில் சர்வீசஸ் முதல்நிலை தேர்வு நேற்று நடைபெற்றது. உத்தரபிரதேசம் முழுவதும் 917 மையங்களில் நடைபெற்ற தேர்வை நான்கரை லட்சம் தேர்வர்கள் எழுதினர்.காலை 9.30 மணிக்கு, முதல் ஷிப்ட் தேர்வு தொடங்க இருந்த நிலையில், 9.15 மணிக்கு திடீரென கேள்வித்தாள் ‘வாட்ஸ்அப்’ மூலம் ரகசியமாக வெளியானது. முதல் ஷிப்ட் தேர்வு நடந்து கொண்டிருந்தபோது, இச்செய்தி காட்டுத்தீ போல பரவியது. அதிகாரிகள் இரு கேள்வித்தாள்களையும் ஒப்பிட்டு பார்த்து, இரண்டும் ஒன்றுதான் என்பதை உறுதி செய்தனர். இந்த வினாத்தாள், ரூ5 லட்சத்துக்கு விற்கப்பட்டதாக ஊடகங்கள் தெரிவித்தன.

உத்தரபிரதேச அரசு பணியாளர் தேர்வாணையம் முன்பு இளைஞர்கள் பலர் ஆர்ப்பாட்டம் நடத்தினர். தேர்வாணைய தலைவரை நீக்க வேண்டும் என்றும், சி.பி.ஐ. விசாரணை நடத்த வேண்டும் என்றும் பா.ஜனதா உள்ளிட்ட அரசியல் கட்சிகள் கோரிக்கை விடுத்துள்ளன. இந்த தேர்வை ரத்து செய்வது குறித்து தேர்வாணைய அதிகாரிகள் பரிசீலித்து வருகிறார்கள்.