Tripura CM Manik Sarkar | Moral Development for Students:

ஒழுக்கமுடன் நல்ல பிள்ளையாக வளர்வதே பெற்றோர், ஆசிரியருக்கு மாணவர்கள் கொடுக்கும் மிகப் பெரிய தட்சணை: திரிபுரா முதல்வர் மாணிக் சர்கார் பேச்சு 

ஒழுக்கமுடன் நல்ல பிள்ளையாக வளர வேண்டும். இதுதான் பெற்றோருக்கும், ஆசிரியருக்கும் மாணவர்கள் கொடுக்கும் மிகப் பெரிய தட்சணை என திரிபுரா மாநில முதல்வர் மாணிக் சர்கார் பேசினார். சென்னை கொளத்தூர் பேப்பர் மில்ஸ் சாலையில் எவர்வின் மெட்ரிக்குலேஷன் மேல்நிலைப்பள்ளி உள்ளது. இந்த பள்ளியின் 25ம் ஆண்டு வெள்ளி விழா நேற்று கொண்டாடப்பட்டது. பள்ளியின் மூத்த முதல்வர் புருஷோத்தமன் தலைமை வகித்தார். எவர்வின் பள்ளிகளின் முதன்மை நிர்வாக மேலாளர் மகேஸ்வரி முன்னிலை வகித்தார். சிறப்பு விருந்தினராக திரிபுரா மாநில முதல்வர் மாணிக் சர்கார் கலந்து கொண்டு, பள்ளியில் அதிக மதிப்பெண் பெற்ற மாணவர்களுக்கு பதக்கம், சான்றிதழ் வழங்கி பேசியதாவது: நான் எத்தனையோ நிகழ்ச்சிகளுக்கு சென்றுள்ளேன். ஆனால், இவ்வளவு மாணவ, மாணவிகளின் கூட்டம் கொண்ட நிகழ்ச்சியில் கலந்து கொண்டதில்லை. ஒரு மாணவன், நல்ல நிலைக்கு வருவதற்கு முதல் காரணம் அவனது பெற்றோர், ஆசிரியர்களின் பங்கு மிக முக்கியமானது.

குழந்தையை பெற்றோம் என்று இல்லாமல், பெற்றோர்கள் அவர்களுக்கு நல்ல விஷயங்களை கற்றுத்தர வேண்டும். குழந்தைகள் பல்வேறு கேள்விகளை கேட்பார்கள். அதற்கு, நாம் கோபப்படாமல், அவர்களின் கேள்விகளுக்கு தெளிவான பதில் கூறவேண்டும். தவறான பதிலை நாம் கூறினால், அது அவர்களது மனதில் ஆழமாக பதிந்துவிடும். நன்றாக படிக்கும் மாணவ, மாணவிகள் டாக்டர், இன்ஜினியராக ஆவது முக்கியமில்லை. ஒழுக்கமுடன் நல்ல பிள்ளையாக வளர வேண்டும். இதுதான் பெற்றோருக்கும், ஆசிரியருக்கும் மாணவர்கள் கொடுக்கும் மிகப் பெரிய தட்சணை. ஒரு மாணவனுக்கு முதல் ஆசிரியர் அவனது பெற்றோர்தான். பெற்றோரின் அரவணைப்பும், அறிவுரையும், கண்டிப்பும்தான் அந்த மாணவன், சிறுவயதில் இருந்து பெரிய மனிதன் ஆகும்வரை அவனது பெருமை நிலைநாட்டப்படும். இவ்வாறு அவர் பேசினார்.