என்னய்யா நடக்குது தமிழ்நாட்டு கல்வித்துறையில !!!

என்னய்யா நடக்குது தமிழ்நாட்டு கல்வித்துறையில* +பெரிய வட்டங்களை நிர்வாக வசதிக்காக சிறிய வட்டங்களாக பிரிப்பதும், பெரிய மாவட்டங்களை நிர்வாக வசதிக்காக சிறிய மாவட்டங்களாக பிரிப்பதும்,பெரு நகரங்களை நிர்வாக வசதிக்காக இதர மாநகரகங்களாக பிரிப்பதும் எதற்கென்றால் அரசின் திட்டங்கள் விரைந்து  மக்களை சென்றடையவேண்டும் என்பதற்காகத்தான். இவ்வாறு பெரிய துறைகளையும் நிர்வாக வசதிக்காக பிரித்து துரித வளர்ச்சியை எட்டி நல்ல நிர்வாகத்தை அளிக்கவேண்டும் என்ற அடிப்படையில் பிரிக்கின்றனர். ஆனால் கல்வித்துறை என்பது தமிழ்நாடு அளவில் 37000தொடக்கப்பள்ளிகள்,8000க்கும் மேற்பட்ட நடுநிலைப் பள்ளிகள்,6000உயர்நிலை, மேல்நிலைப் பள்ளிகளை உள்ளடக்கியது ஆகும்.இவ்வளவு மிகமிகப் பெரிய கல்வித்துறையில் தொடக்கக்கல்வித்துறை, பள்ளிக்கல்வித்துறை என இரு துறைகள் மட்டும் செயல்பட்டுக் கொண்டிருக்கிறது.

இதிலிருந்து 11மற்றும் 12ம் வகுப்பிற்கு தனி துறை ஏற்படுத்தி நிர்வாகத்தை செம்மைப்படுத்தவேண்டும். அப்பொழுதுதான் உலகத்தில் கல்வியில் முதன்மை நாடாக விளங்கும் பின்லாந்து நாட்டைப் போன்று கல்வியில் நமது மாநிலமும் வளர்ச்சியைக் காட்ட முடியும்.அதைவிடுத்து 1.6.2018 முதல் மாவட்ட தொடக்கக்கல்வி அலுவலர் பணியிடங்கள் ஒழிக்கப்பட்டு அரசாணைநிலை எண் 101 ன்படி மாவட்டக் கல்வி அலுவலகங்கள் கூடுதலாக ஏற்படுத்தப்பட்டதின் விளைவாக ஒன்றிய அளவில் செயல்பட்டுக் கொண்டிருந்த உதவித் தொடக்கக் கல்வி அலுவலர்களின் பெயர்கள் மாற்றப்பட்டதோடு மட்டுமல்லாமல் அவர்களின் அதிகாரங்களும் குறைக்கப்பட்டன.கல்வியில் வளர்ச்சி ஏற்படும் என்று எண்ணினோம்.ஆனால் உதவித் தொடக்கக்கல்வி அலுவலகத்தில் முடிக்கப்பட வேண்டிய தேர்வுநிலை,சிறப்புநிலைகள்,உயர்கல்வி பயில முன்அனுமதி ஆகியன தேக்கநிலை மில் இருப்பது வருத்தத்திற்குரியதாகும்.இவ்வாறே கடந்த வாரம் மேல்நிலைப் பள்ளிகளில் பகுதி குறுவள மையம்,இந்த வாரம் அரசாணை எண் 145ன்படி மேல்நிலைப் பள்ளி வளாகத்தில் இருக்கும் தொடக்க , நடுநிலைப் பள்ளிகளை ஆய்வு செய்யும் அதிகாரம் உயர்/மேல்நிலைப் பள்ளி தலைமை ஆசிரியர்களுக்கு வழங்கப்பட்டுள்ளது.இனி அடுத்த வாரம் என்ன வருமோ என்று எண்ணத்தோன்றுகிறது.எனவே தமிழ்நாட்டின் முன்னாள் முதலமைச்சர் மாண்புமிகு அம்மா அவர்களின் ஆட்சிக்காலத்தில் 1994ம் ஆண்டில் ஏற்படுத்தப்பட்ட தொடக்கக் கல்வித்துறை ஒழிக்கப்படாமல் தொடர்ந்து நடைமுறைப்படுத்தபட வேண்டும். ஆனால் நிலைமை தலைகீழாக அதிகாரப் பரவல் தவிர்க்கப்பட்டு அதிகாரம் ஒரே இடத்தில் மீண்டும் குவிக்கப்படுவது கண்கூடாக தெரிகிறது. இதற்கு காரணம் தொடக்கப்பள்ளி ஆசிரியர்கள் மற்றும் ஆசிரியர் சங்கங்களை ஒழிக்க வேண்டும் என்ற எண்ணம்தான். இதன் காரணமாக ஏழை எளிய மக்களுக்கு கிடைத்துவரும் விலையில்லா கல்வியானது எட்டாக்கனியாக மாறும்.... சமுதாயத்தில் குற்றங்கள், நல்லொழுக்க குறைபாடுகள் அதிகரித்து எதிர்கால சமுதாயம் கல்வி இன்றி அழிவின் விளிம்பிற்கு செல்லும் என்பதில் மாற்றுக் கருத்து இல்லை .எனவே தொடக்கக் கல்விக்கு முக்கியத்துவம் கொடுத்து முன்புபோலவே தொடக்கக் கல்வித்துறை யை முழு சுதந்திரத்துடன் செயல்பட தனி துறையும் ,அதற்கான தனி அமைச்சரவையும், அமைச்சரும் நியமிக்கப்பட்டால் மட்டுமே எதிர்கால சந்ததி வளம்பெறும். ஆனால் இதுவெல்லாம் நடக்குமா என்பது கேள்விக்குறியே ⁉      🔥🔥🔥 ஆசான்