கர்நாடக அரசுக் கல்லூரிகளில் விரைவில் மலிவு விலை மதிய உணவு!
கர்நாடக மாநிலத்தின் அனைத்து அரசுக் கல்லூரிகளிலும், குறைந்த விலையில் மதிய உணவு வழங்கும் திட்டம் இறுதி வடிவம் பெற்று வருகிறது. இத்திட்டத்தின் மூலம், மாணவர்கள் மட்டுமல்ல, ஆசிரியர்கள் மற்றும் ஆசிரியரல்லாத பிற கல்லூரி ஊழியர்களும் பயன் பெறுவார்கள் என்று தெரிவிக்கப்பட்டுள்ளது.
இதுதொடர்பாக கர்நாடக அரசு வட்டாரங்கள் கூறுவதாவது: மாணவர்களுக்கு சத்தான
உணவு கிடைத்தால்தான், அவர்களால் படிப்பில் சிறப்பான கவனம் செலுத்த
முடியும். நல்ல புரதச் சத்துடன் வழங்கப்படவுள்ள இந்த உணவு, மாணவர்களுக்கு
ரூ.5க்கும், ஆசிரியர் அல்லாத பணியாளர்களுக்கு ரூ.15க்கும், ஆசிரியர்களுக்கு
ரூ.20க்கும் வழங்கப்படும். இவ்வாறு அவர்கள் கூறினர்.
கடந்த 2011ம் ஆண்டில், பெங்களூர் பல்கலை, முதுநிலை மாணவர்களுக்கான மதிய
உணவுத் திட்டத்தை அறிமுகப்படுத்தியது. குறிப்பாக, கிராமப்புற மாணவர்களை
குறிவைத்து இந்த திட்டம் கொண்டுவரப்பட்டது. குறிப்பாக கிராமப்
பகுதிகளிலிருந்து வரும் மாணவிகள், தங்களின் இல்லம் திரும்ப இரவு வரை
ஆகிவிடுகிறது. இதனால், பலர் சரியான நேரத்தில் உணவு உண்ண முடியாமல்
அவதியுறுகின்றனர். இதுவே இத்திட்டத்திற்கான முக்கிய காரணம் என்று பல்கலை
வட்டாரங்கள் தெரிவித்தன.
பெங்களூர் பல்கலையில் வழங்கப்படும் முதுநிலை மாணவர்களுக்கான மதிய உணவு,
பொதுப்பிரிவு மாணவர்களுக்கு ரூ.4க்கும், SC/ST பிரிவு மாணவர்களுக்கு
ரூ.2க்கும் வழங்கப்படுகிறது.
