பிற்படுத்தப்பட்டோருக்கான "கிரீமிலேயர்' உச்சவரம்பை மத்திய அரசு உயர்த்த
வேண்டும் என்று திமுக தலைவர் கருணாநிதி, பாமக நிறுவனர் ராமதாஸ் ஆகியோர்
வலியுறுத்தினர்.இது தொடர்பாக புதன்கிழமை அவர் வெளியிட்ட அறிக்கை:-இதர
பிற்படுத்தப்பட்ட சமுதாயத்தைச் சேர்ந்தவர்கள் பயன்பெறும் வகையில்,
"கிரீமிலேயருக்கான' (முன்னேறிய பிரிவினர்) உச்ச வரம்பை, தற்போதுள்ள ரூ.6
லட்சத்தில் இருந்து ரூ.10.50 லட்சமாக உயர்த்த வேண்டும் என்று மத்திய
அரசுக்கு பிற்படுத்தப்பட்டோருக்கான தேசிய ஆணையம் பரிந்துரை செய்துள்ளது.
இது வரவேற்கத்தக்கது. மத்திய அரசு நிறுவனங்களிலும், பொதுத் துறை
நிறுவனங்களிலும் பிற்படுத்தப்பட்டவர்களுக்கு 27 சதவீத இடஒதுக்கீடு
அளிக்கப்படும் என்று 1990-இல் வி.பி.சிங் ஆட்சியில் அறிவிக்கப்பட்டது.2004-இல்
ஐக்கிய முற்போக்கு கூட்டணி ஆட்சியில் மனித வள மேம்பாட்டுத் துறை அமைச்சராக
இருந்த அர்ஜுன் சிங் மூலம் கோரிக்கை வைக்கப்பட்டு, அவரும் 27 சதவீத
இடஒதுக்கீட்டுக்கான ஆணையைப் பெற்றுத் தந்தார். எனினும், நடைமுறையில்
இருந்து வந்த கிரீமிலேயர் பிரிவினருக்கான வருமான வரம்பினை உயர்த்தி,
பிற்படுத்தப்பட்டோரில் மேலும் பலர் பயன் அடைவதற்கான வழிவகைகள் செய்ய
வேண்டும் என்று திமுக வலியுறுத்தி வந்தது. இந்த நிலையில் 27 சதவீத
இடஒதுக்கீட்டை முழுமையாக நிறைவேற்ற முடியாவிட்டாலும், கிரீமிலேயர் தொடர்பான
பிற்படுத்தப்பட்டோர் ஆணையத்தின் பரிந்துரையையாவது பிரதமர் நரேந்திர மோடி
தலைமையிலான மத்திய அரசு நிறைவேற்ற முன் வரவேண்டும். இதற்கான ஆணையை உடனடியாக
வெளியிட வேண்டும் என்று அவர் கூறியுள்ளார்.ராமதாஸ்: பிற பிற்படுத்தப்பட்ட வகுப்பினருக்கு 27 சதவீத இடஒதுக்கீடு வழங்கப்பட்டு 7 ஆண்டுகள் ஆகும் நிலையில் அங்கும் பிற பிற்படுத்தப்பட்ட வகுப்பினருக்கான இடஒதுக்கீட்டை அச்சமுதாயங்களைச் சேர்ந்த மாணவர்களால் முழுமையாகப் பயன்படுத்திக் கொள்ள முடியவில்லை. இதற்கெல்லாம் காரணம் நடுத்தரக் குடும்பங்களையும் "கிரீமிலேயர்'களாக காட்டும் ஊதிய வரம்பு தான். எனவே, "கிரீமிலேயர்' உச்ச வரம்பை ரூ.10.50 லட்சமாக உயர்த்த வேண்டும் என்ற பிற்படுத்தப்பட்டோர் ஆணையத்தின் பரிந்துரையை மத்திய அரசு ஏற்க வேண்டும்.
