ஐ.டி.ஐ. நுழைவு தேர்வு அனுமதி சீட்டில் நாய் புகைப்படத்தை பார்த்து மாணவர் அதிர்ச்சி:

மேற்கு வங்களத்தில் ஐ.டி.ஐ. நுழைவு தேர்வு எழுதுவதற்கான அனுமதி சீட்டை இணையதளத்தில் இருந்து பதிவிறக்கம் செய்தபோது, அதில் முகவரி மற்றும் பிற விவரங்களுடன் மாணவரின் புகைப்படம் இல்லாமல் நாய் ஒன்றின் புகைப்படம் இருந்துள்ளது அவருக்கு அதிர்ச்சியை ஏற்படுத்தியுள்ளது.  மேற்கு வங்காளத்தை சேர்ந்தவர் சவும்யாதீப் மஹதோ (வயது 18).  இந்த வருடம் மேல் நிலை பள்ளிப்படிப்பை முடித்த அவர் ஐ.டி.ஐ. படிப்பில் சேர முடிவு செய்துள்ளார்.
எனவே, ஐ.டி.ஐ. நுழைவு தேர்வை எழுதுவதற்கான அனுமதி சீட்டை அதற்குரிய அதிகாரபூர்வ இணையதளத்தில் இருந்து பதிவிறக்கம் செய்துள்ளார்.  அதில் அவரது வீட்டு முகவரி மற்றும் பிற விவரங்கள் சரியாக இருந்தன.  ஆனால், அவரது நுழைவு சீட்டில் புகைப்படம் இருக்க வேண்டிய இடத்தில் நாய் ஒன்றின் புகைப்படம் இருந்துள்ளது.

இதனை கண்டு அதிர்ச்சி அடைந்த மஹதோ, அந்த பகுதியில் தேர்வு நடத்தும் அதிகாரியை தொடர்பு கொண்டார்.  அவர் மஹதோவுக்கு உதவி செய்யப்படும் என உறுதி அளித்துள்ளார்.  இதனை தொடர்ந்து நேற்று மாலை நுழைவு சீட்டில் இருந்து நாயின் புகைப்படம் நீக்கப்பட்டது.  புதிய அனுமதி சீட்டை கொண்டு பொது நுழைவு தேர்வை மஹதோ எழுத முடியும்.  இந்த சம்பவம் குறித்து விசாரணைக்கு உத்தரவிடப்பட்டுள்ளது என அதிகாரி கூறியுள்ளார்.