உத்தரபிரதேச மாநிலம் பிரதாப்கார் நகரைச் சேர்ந்த தரம்ராஜ் என்ற கூலித்
தொழிலாளியின் மகன்கள் பிரிஜேஷ் (வயது 19), ராஜூ(18). அண்மையில் நடந்து
முடிந்த ஐ.ஐ.டி. தேர்வில் ராஜூ 167 இடமும், பிரிஜேஷ் 410–வது இடமும்
பிடித்தனர். எனினும் குடும்ப சூழ்நிலை காரணமாக இந்த சகோதரர்களால்
மேற்கொண்டு படிப்பை தொடர முடியாத நிலை இருந்தது.
இவர்களது வறிய
நிலையை அறிந்த காங்கிரஸ் துணைத் தலைவர் ராகுல்காந்தி இருவரின் கல்விச்
செலவுக்கு உதவுவதாக நேற்று தெரிவித்தார். இதேபோல் உத்தரபிரதேச
முதல்–மந்திரி அகிலேஷ்யாதவ், இந்தி நடிகர் அமீர்கான் ஆகியோரும்
இருவருக்கும் உதவிக்கரம் நீட்டியுள்ளனர்.
இந்த நிலையில் மத்திய
மனிதவள மேம்பாட்டு மந்திரி ஸ்மிரிதி இரானிக்கு, பிரிஜேஷ்–ராஜூ சகோதரர்கள்
படிப்பை தொடர முடியாத நிலை குறித்து ஊடகங்கள் மூலம் தெரிய வந்தது.
இதையடுத்து,
அவர் டுவிட்டரில், ‘‘ஐ.ஐ.டி.யில் சேரும்போது சகோதரர்களின் நுழைவுக்
கட்டணம் ரத்து செய்யப்படும். இருவரும் ஏழ்மையான குடும்பத்தைச்
சேர்ந்தவர்கள் என்பதால் கல்விக் கட்டணம், உணவுக் கட்டணம் மற்றும் இதர
கட்டணங்களுக்காக உதவித் தொகை பெறவும் தகுதியானவர்கள்’’ என்று
குறிப்பிட்டார்.
