தமிழகத்தில் கல்வி, வேலைவாய்ப்பு ஆகியவற்றில் கடைப்பிடிக்கப்படும் 69 சதவீத
இடஒதுக்கீட்டால் பாதிக்கப்பட்டுள்ள பொதுப் பிரிவைச் சேர்ந்த 8
மாணவர்களுக்கு நிகழ் கல்வியாண்டில் மருத்துவக் கல்லூரிகளில் சேர வசதியாக
கூடுதல் இடங்களை ஒதுக்கும்படி தமிழக அரசுக்கு உச்ச நீதிமன்றம்
உத்தரவிட்டது.
தமிழகத்தைச் சேர்ந்த லோகேஸ்வரி, ஸ்ருதி, ஸ்ரீ வித்யா,
விஜிதா, வெங்கட்ராமன், மிருதுளா, மெய்யம்மை, ஜனனி ஆகிய பொதுப் பிரிவைச்
சேர்ந்த 8 மாணவர்கள் 2014-15 கல்வியாண்டில் பிளஸ் 2 வகுப்பு முடித்தனர்.இதையடுத்து,
2015-16 கல்வியாண்டில் மருத்துவப் படிப்பில் சேர விண்ணப்பித்திருந்தனர்.
உரிய "கட்-ஆஃப்' மதிப்பெண்கள் பெற்றிருந்தும் தமிழகத்தில் மாநில அரசு
கடைப்பிடிக்கும் 69 சதவீத இடஒதுக்கீட்டு முறையால் மருத்துவக் கல்லூரிகளில்
சேர இடம் கிடைக்கவில்லை எனக் கூறி, 8 மாணவர்களும் உச்ச நீதிமன்றத்தில்
தனித்தனியாக மனுக்களைத் தாக்கல் செய்தனர்.இந்த மனுக்கள் உச்ச நீதிமன்ற நீதிபதிகள் தீபக் மிஸ்ரா, பிரஃபுல்லா சி.பண்ட் ஆகியோர் அடங்கிய அமர்வு முன் திங்கள்கிழமை விசாரணைக்கு வந்தது.
மாணவர்களின் எதிர்காலம்: அப்போது, மாணவர்கள் சார்பில் ஆஜரான வழக்குரைஞர் ஜி.சிவபாலமுருகன், "தமிழக அரசு கடைப்பிடித்து வரும் 69 சதவீத இடஒதுக்கீட்டு முறையால் பாதிக்கப்பட்டுள்ள 8 மாணவர்களுக்கும் நிகழ் கல்வியாண்டில் கல்லூரிகளில் இடம் ஒதுக்க தமிழக அரசுக்கு உத்தரவிட வேண்டும்' என்று கேட்டுக் கொண்டார்.
அவரது வாதத்தை பதிவு செய்துகொண்ட நீதிபதி தீபக் மிஸ்ரா, இந்த விஷயத்தில் தமிழக அரசின் நிலைப்பாடு குறித்து கேள்வி எழுப்பினார். அப்போது, தமிழக அரசு தரப்பில் மூத்த வழக்குரைஞர் ராகேஷ் துவிவேதி ஆஜராகி, "தமிழகத்தில் நிகழ் கல்வியாண்டுக்கான மருத்துவ கலந்தாய்வு முடிந்துவிட்டது. விரைவில் மருத்துவக் கல்லூரிகள் திறக்கப்பட உள்ளன' என்றார்.
இதையடுத்து, நீதிபதி தீபக் மிஸ்ரா பிறப்பித்த உத்தரவில், "தமிழக அரசு கடைப்பிடித்து வரும் இடஒதுக்கீடு முறையால் பாதிக்கப்பட்டுள்ள மாணவர்களின் எதிர்காலத்தை மாநில அரசு கவனத்தில் கொள்ள வேண்டும். கடந்த ஆண்டுகளில் கல்லூரிகளில் இடம் கிடைக்காமல் உச்ச நீதிமன்றத்தில் முறையிட்ட பொதுப் பிரிவு மாணவர்களுக்கு கூடுதல் இடம் ஒதுக்கியது போல, நிகழ் ஆண்டிலும் பாதிக்கப்பட்ட எட்டு மாணவர்களுக்கு கூடுதல் இடங்கள் ஒதுக்க தமிழக அரசு நடவடிக்கை எடுக்க வேண்டும்' என்று குறிப்பிட்டார்.
