தமிழக காவல் துறையில் காலியாக உள்ள காவல் உதவி ஆய்வாளர் பணியிடத்துக்கான நேர்முகத் தேர்வு சென்னையில் வியாழக்கிழமை தொடங்கியது. தமிழ்நாடு
சீருடைப் பணியாளர் தேர்வு வாரியம் காவல்துறையில் உள்ள 1,078 காவல் உதவி
ஆய்வாளர் காலிப்பணியிடங்களுக்கான தேர்வை சில மாதங்களுக்கு முன்பு
அறிவித்தது. இதில் 20 சதவீதம் பணியிடங்களில் அத்துறையைச் சேர்ந்தவர்கள்
தேர்வு செய்யப்படுகின்றனர். இந்தத் தேர்வில் பங்கேற்க 1.65 லட்சம் பேர்
விண்ணப்பித்தனர்.
இந்தத் தேர்வின் முதல் கட்டமாக எழுத்துத் தேர்வு,
பொது ஒதுக்கீட்டுதாரர்களுக்கு கடந்த மே மாதம் 23-ம் தேதி மாநிலம் முழுவதும்
114 தேர்வு மையங்களில் நடைபெற்றது. விண்ணப்பித்தவர்களில் சுமார் 80
சதவீதம் பேர் தேர்வு எழுதினர். இதேபோல காவல்துறை ஒதுக்கீட்டுதாரர்களுக்கு,
எழுத்துத் தேர்வு அதே மாதம் 24-ம் தேதி நடைபெற்றது.இந்தத் தேர்வில் தேர்ச்சி பெற்ற 5 ஆயிரம் பேருக்கு உடல் தகுதித் தேர்வு, உடற்கூறு அளத்தல், உடல்திறன் போட்டி, அசல் சான்றிதழ் சரிபார்ப்பு ஆகியவை சென்னை, காஞ்சிபுரம், விழுப்புரம், வேலூர், சேலம், கோயம்புத்தூர், திருச்சி, தஞ்சாவூர், மதுரை, ராமநாதபுரம், திருநெல்வேலி ஆகிய 11 இடங்களில் கடந்த மாதம் 3,4,5-ஆம் தேதிகளில் நடைபெற்றது.
இதில் தேர்ச்சி பெற்ற சுமார் 2,100 பேருக்கு நேர்முகத் தேர்வுக்கான அழைப்புக் கடிதம் அனுப்பப்பட்டிருந்தது. இவர்களுக்கு நேர்முகத் தேர்வு சென்னை எழும்பூரில் உள்ள தமிழ்நாடு சீருடைப் பணியாளர் தேர்வு வாரியம் அலுவலகத்தில் வியாழக்கிழமை (செப்.3) தொடங்கியது. இதில் உடல் தகுதித் தேர்வில் தேர்ச்சி பெற்ற 50 பேர் பங்கேற்றனர். இவர்களிடம் சீருடை வாரிய அதிகாரிகள் நேர்முகத் தேர்வை நடத்தினர்.
இவ்வாறு தினமும் 50 பேரிடம் நேர்முகத் தேர்வு நடத்தப்படுகிறது. நேர்முகத் தேர்வில் தேர்ச்சி பெறுகிறவர்களுக்கு, அடுத்தக் கட்டமாக மருத்துவ சோதனை செய்யப்படுகிறது. மருத்துவத் தகுதி பெறுகிறவர்களுக்கு, பணி நியமன ஆணை வழங்கப்படுகிறது.
