பள்ளிக் கட்டண விவகாரம்: தனியார் சிபிஎஸ்சி பள்ளி நிர்வாக சங்கம் பதில் அளிக்க அவகாசம்:
தமிழ்நாடு தனியார் பள்ளிகள் கட்டண ஒழுங்குமுறைச் சட்டத்துக்கு எதிரான
மேல்முறையீட்டு வழக்கில் தனியார் சிபிஎஸ்இ (மத்திய பள்ளிக் கல்வி வாரியம்)
பள்ளி நிர்வாகிகள் சங்கம் பதில் அளிக்க 2 வாரங்கள் அவகாசம் வழங்கி உச்ச
நீதிமன்றம் புதன்கிழமை உத்தரவிட்டது.இது தொடர்பான வழக்கை நீதிபதிகள்
எம்.ஒய். இக்பால், சி. நாகப்பன் ஆகியோர் அடங்கிய அமர்வு புதன்கிழமை
விசாரிப்பதாக இருந்தது. இந்த நிலையில், நீதிபதிகள் முன் தனியார் சிபிஎஸ்இ
(மத்திய பள்ளிக் கல்வி வாரியம்) பள்ளி நிர்வாகங்கள் சங்கம் சார்பில் மூத்த
வழக்குரைஞர் அரிமா சுந்தரம் ஆஜராகி, இந்த விவகாரத்தில் தமிழக அரசு தாக்கல்
செய்துள்ள மனுவுக்கு பதில் அளிக்க இரண்டு வாரம் கூடுதல் அவகாசம் அளிக்க
வேண்டும்' எனக் கேட்டுக் கொண்டார்.
இதை ஏற்றுக் கொண்ட நீதிபதிகள்,
தனியார் சிபிஎஸ்இ பள்ளி நிர்வாகிகள் சங்கம் பதில் மனு தாக்கல் செய்ய இரு
வாரங்கள் அவகாசம் அளித்து உத்தரவிட்டனர். பின்னணி: தனியார் பள்ளிகளுக்கு நிர்ணயிக்கப்படும் கட்டணம், சிபிஎஸ்இ பள்ளிகளுக்கும் பொருந்தும் என்று தமிழக அரசால் நியமிக்கப்பட்ட நீதிபதி சிங்காரவேலு குழு, 2013, செப்டம்பரில் அறிவித்தது. இதை எதிர்த்து, தனியார் சிபிஎஸ்இ பள்ளி நிர்வாகங்கள் சங்கம் சார்பில் சென்னை உயர் நீதிமன்றத்தில் தாக்கல் செய்யப்பட்ட வழக்கு தள்ளுபடி செய்யப்பட்டது. மேலும், "தமிழக அரசின் சட்டத்துக்கு தனியார் சிபிஎஸ்இ பள்ளிகள் கட்டுப்பட வேண்டும்' என 2013, செப்டம்பர் 21-ஆம் தேதி உயர் நீதிமன்றம் உத்தரவிட்டது. இதை எதிர்த்து, தனியார் சிபிஎஸ்இ பள்ளி நிர்வாகங்கள் சங்கம் உச்ச நீதிமன்றத்தில் மேல்முறையீடு செய்துள்ளது. இந்த வழக்கில் தமிழக அரசு பதில் மனு தாக்கல் செய்துள்ளது.
