வைட்டமின் பத்தி மட்டும் யோசிக்கிறீங்களே, மெக்னீசியத்தையும் பார்த்துக்கிட்டா.. இதயம் பத்திரமா இருக்குமில்ல..!!
மெக்னிசியம் குறைபாடு உடலில் மோசமான விளைவுகளை உண்டாக்கும் என்பதையும் அதன் அறிகுறிகள் குறித்தும் பார்த்திருக்கிறோம். ஏன் மெக்னீசியம் உடலுக்கு நன்மை செய்யகூடியது என்பதை இப்போது பார்க்கலாம்.
உடலில் உயிர்வேதியியல் எதிர்வினைகளுக்கு அதிலும் 300க்கும் மேற்பட்ட செயல்களுக்கு மெக்னீசியம் உதவுகிறது என்பது ஆச்சரியமாக இருக்கலாம். ஆனால் பொதுவாக வைட்டமின்
குறைபாடு மட்டுமே மனதில் கொண்டிருக்கும் அனைவரும் மெக்னீசியம் போன்ற முக்கியமான இதரசத்துகளின் குறைபாடு குறித்து போதுமான விழிப்புணர்வு கொண்டிருக்கவில்லை என்பதையும் மறுக்க முடியாது.
உடல் எளிதாக உறிஞ்சுக்கொள்ளும் சத்துகளில் மெக்னீசியமும் ஒன்று. இந்த தாது மல்டி வைட்டமின்களிலும் கிடைக்கிறது. இந்த மெக்னீசியம் ஏன் முக்கியம், இவை உடலுக்கு தரும்
நன்மைகள் குறித்து தெரிந்துகொள்வோம்.
மெக்னீசியம் என்பது..
மெக்னீசியம் உடலில் நான்காவது அதிகமான கனிமம் என்று நியூட்ரிஷியண்ட் இதழில் வெளியிடப்பட்ட அறிக்கையில் தெரிவிக்கப்பட்டுள்ளது. மெக்னீசியம் உடலில் தசை மற்றும் நரம்பு செயல்பாடுகளிலும் , டி.என்.ஏ மற்றும் ஆர். என்.ஏ தொகுப்பிலும், இதய ஆரோக்கியத்தை மேம்படுத்துவதிலும் ஆற்றல் உற்பத்திக்கும் உதவுகிறது. மெக்னீசியம் பச்சை இலை காய்கறிகள், முழு தானியங்கள், பீன்ஸ், கொட்டைகள், விதைகள் மற்றும் மீன் போன்ற பல உணவுகளில் இயற்கையாகவே நிறைந்துள்ளது. பால், தயிர் மற்றும் பால் பொருள்கள் மற்றம் பலப்படுத்தப்பட்ட உணவுகள் மூலமாகவும் இந்த தாதுவை பெறமுடியும். மெக்னீசியம் உடலுக்கு தரும் நன்மைகள் குறித்து பார்க்கலாம்.
உயர் ரத்த அழுத்தத்தை கட்டுப்படுத்துகிறது..
2016 உயர் ரத்த அழுத்த இதழில் வெளியிடப்பட்ட ஆய்வின் படி 3 மாதங்களுக்கு வாய்வழி மெக்னீசியம் சப்ளிமெண்ட் (368 மி.கி / நாள் ஒன்றுக்கு) கணிசமாக சிஸ்டாலிக், டாய்ஸ்டாலிக்,
சாதாரண மற்றும் உயர் ரத்த அழுத்தம் உள்ள பெரியவர்களில் இரத்த அழுத்தம் கணிசமாக குறைத்தது கண்டறியப்பட்டது. ஐரோப்பிய ஊட்டச்சத்து மருத்துவ இதழில் வெளியிடப்பட்ட மற்றொரு ஆய்வு இரத்த அழுத்தத்தில் மருத்துவ ரீதியாகவே முக்கியமான குறைப்புக்கு மெக்னீசியம் உதவுவதாக உறுதிப்படுத்தியுள்ளது. அதே நேரம் இது குறித்து முழுமையாக ஆய்வு செய்ய இன்னும் சோதனைகள் தேவைப்படுகின்றன.
மெக்னீசியம் மனநிலையை மேம்படுத்துகிறது..
மெக்னீசியத்தின் குறைபாடு மனச்சோர்வுடன் இணைக்கப்பட்டுள்ளது. காரணங்களே இல்லாமல் எப்போதும் மன அழுத்தத்தோடு இருந்தால் அது மெக்னீசியம் குறைபாடு அறிகுறியாகவும் இருக்கலாம். குறைந்த அளவு தாதுக்கள், அதிகப்படியான கால்சியம் மற்றும் மன அழுத்தத்துடன் இணைந்து இது கவலை மற்றும் தூக்கமின்மையை உண்டாக்குகிறது என்று ஆராய்ச்சிகள் கண்டறிந்துள்ளது. 2017 ல் நடத்தப்பட்ட சோதனை 6 வாரங்களுக்கு மெக்னீசியம் குளோரைடு உட்கொள்வது இலேசானது முதல் மிதமான மனச்சோர்வு உள்ள பெரியவர்களுக்கு பயனளிக்கும் என்று கண்டறியப்பட்டுள்ளது. இதன் விளைவுகள் 2 வாரங்களுக்குள் கண்டறியக்கூடும்.
இரத்த சர்க்கரையை கட்டுப்படுத்துகிறது மெக்னீசியம்..
இரத்த சர்க்கரையை கட்டுப்படுத்த இவை உதவக்கூடும். பல நொதி செயல்முறைகள் மூலம் இரத்த சர்க்கரை அளவை இன்சுலின் கட்டுப்படுத்துவதில் மெக்னீசியம் முக்கிய பங்கு வகிக்கிறது. 3 மாதங்களுக்கு தினமும் 300 மி.கிராம் மெக்னீசியம் உட்கொள்வது உணவுக்கு முந்தைய ரத்த சர்க்கரை அளவைகட்டுப்படுத்த செய்கிறது. அதே போன்று டைப் 2 நீரிழிவு நோயாளிகளுக்கு நன்மை செய்வதாக உள்ளது. நீரிழிவுக்கான பத்திரிக்கையின் கூற்றுப்படி நீரிழிவு நோயாளிகளுக்கு இன்சுலின் எதிர்ப்பு, ஆக்ஸிஜனேற்ற அழுத்தம் மற்றும் அழற்சியை நிர்வகிக்க மெக்னீசியம் கூடுதலாக உதவுகிறது.
ஒற்றைத் தலைவலியை தடுக்க மெக்னீசியம்..
ஒற்றைத் தலைவலியை தடுக்க மெக்னீசியம் உதவலாம். ஒற்றைத் தலைவலி நோயால் பாதிக்கப்பட்டவர்களுக்கு குறைந்த அளவு மெக்னீசியம் இருப்பதாக ஆய்வுகள் கண்டறிந்துள்ளன. ஒற்றைத் தலைவலிக்கான இதழில் வெளியிடப்பட்ட 2018 ஆம் ஆண்டு ஆய்வு கட்டுரையில் 600 மி.கிராம் மெக்னீசியம் சிட்ரேட் ஒற்றைத் தலைவலியை தடுப்பதற்கான எளிமையான சிகிச்சை என்று சொல்லப்படுகிறது.
எவ்வளவு வரை எடுக்கலாம்..
ஆண்களுக்கு தினசரி அளவில் பரிந்துரைக்கப்படும் மெக்னீசியம் 400-420 மி.கிராம் அளவு தேவைப்படுகிறது. பெண்களுக்கு 300 - 320 மி.கிராம் அளவு தேவைப்படுகிறது. கர்ப்பிணி பெண்களுக்கு 350-360 மி.கிராம் பெரும்பாலான மல்டி வைட்டமின்களில் மெக்னீசியம் தினசரி உட்கொள்ளலில் தினசரி தேவையான அளவு அல்லது அதற்கு மேல் உள்ளது. உணவில் மெக்னீசியம் குறைபாடு இருப்பதாக உணர்ந்தால் மருத்துவரை சந்தித்து ஆலோசனை பெறுவது அவசியம்.
பகிர்வு
