அரசு வீட்டுக் கடன் சலுகை மேலும் 6 மாதங்களுக்கு நீட்டிப்பு : முதல்வர்
தமிழ்நாடு கூட்டுறவு வீட்டு வசதி இணையத்தில் கடன் பெற்றவர்களுக்கும்,
தமிழ்நாடு வீட்டு வசதி வாரியத்தில் வீடு பெற்றவர்களுக்கும் வழங்கப்பட்ட
கடன் சலுகை மேலும் 6 மாதங்களுக்கு நீட்டிக்கப்பட்டுள்ளது.
இது குறித்து, தமிழ்நாடு சட்டமன்றப் பேரவை விதி 110-ன் கீழ் தமிழக
முதல்வர் அவர்களின் அறிக்கையில்,
ஏழை, எளிய மக்களின் அத்தியாவசியத்
தேவைகளில் ஒன்றான வீட்டு வசதியை பூர்த்தி செய்வதில் தமிழ்நாடு கூட்டுறவு
வீட்டு வசதி இணையம் முக்கியப் பங்கினை வகிக்கின்றது.
தமிழ்நாடு கூட்டுறவு வீட்டு வசதி இணையம் செலுத்த வேண்டிய தொகை அரசு
அளித்துள்ள பொறுப்புறுதியின் பேரில் அரசே தவணைத் தொகையை செலுத்த வேண்டிய
நிலை ஏற்பட்டது. இதனை தவிர்க்கும் பொருட்டு, கூட்டுறவு வீட்டு வசதி
சங்கங்களில் கடன் வசூல் செய்யப்படும் தொகை முழுவதும் நிதி நிறுவனங்களுக்கு
செலுத்தப்பட வேண்டும் என்றும், கடன் வசூல் முன்னேற்றம் அடையும் வரையில்
புதிய கடன் வழங்கக் கூடாது என்றும் 2009 ஆம் ஆண்டு தி.மு.க. அரசால் உத்தரவு
பிறப்பிக்கப்பட்டது.
கடந்த நான்கு ஆண்டுகளாக புதிய கடன்கள் வழங்கப்படாததாலும், கடன் வசூல்
பணி மட்டுமே நடைபெற்றதாலும் 1.9.2009 அன்று 2,136 கோடி ரூபாயாக இருந்த
தமிழ்நாடு கூட்டுறவு வீட்டு வசதி இணையத்தின் கடன் நிலுவை தற்போது 1,280
கோடி ரூபாயாக குறைந்துள்ளது.
தமிழ்நாடு கூட்டுறவு வீட்டு வசதி இணையத்தின் பணியை மேம்படுத்தும்
வகையில், 2012-2013 ஆம் நிதி ஆண்டில் வட்டி தள்ளுபடி சலுகைத் திட்டம் ஒன்றை
அரசு அறிமுகப்படுத்தியது. இந்தத் திட்டம் 31.3.2013 வரை
செயல்படுத்தப்பட்டது.
அதன்படி, 100 விழுக்காடு கடன் வசூல் எய்தியுள்ள 72 சங்கங்கள் மீண்டும்
உறுப்பினர்களுக்கு கடன் வழங்க உத்தரவுகள் பிறப்பிக்கப்பட்டு உள்ளன.
31.3.2013-ல் தவணை தவறிய உறுப்பினர்கள் 88,356 பேரிடம் மொத்தம் 1,850
கோடியே 50 லட்சம் ரூபாய் வசூலிக்க வேண்டியுள்ளது. இவர்களது நலன் கருதி
வட்டி சலுகைத் திட்டம் மேலும் 6 மாதங்களுக்கு நீட்டிக்கப்பட்டுள்ளது.
தமிழ்நாடு வீட்டு வசதி வாரியத்தால் குடியிருப்புகள் ஒதுக்கீடு
செய்யப்பட்டவர்கள் அதற்கான தவணைத் தொகையை சரிவர செலுத்தாததன் காரணமாக,
அவர்களின் வசதிக்காக பல்வேறு சலுகைகள் அளிக்கப்பட்டன. இதன் மூலம் பலர்
பயனடைந்து கிரயப் பத்திரத்தையும் பெற்றுக் கொண்டனர். இன்னமும் கிரயப்
பத்திரம் வழங்கப்படாமல் உள்ள 45,939 ஒதுக்கீட்டாளர்கள் பயன்பெறும் வகையில்,
இந்த வட்டிச் சலுகைத் திட்டம் மேலும் 6 மாதங்களுக்கு
நீட்டிக்கப்பட்டுள்ளது.
மேற்காணும் தமிழக அரசின் நடவடிக்கைகளால் கூட்டுறவு வீட்டு வசதி
சங்கங்களில் உறுப்பினர்களாக உள்ள நகர்ப்புற மற்றும் கிராமப்புற ஏழை, எளிய,
நடுத்தர மக்களின் கடன் சுமை குறையும் என்பதையும், தமிழ்நாடு வீட்டுவசதி
வாரியத்தால் ஒதுக்கீடு செய்யப்பட்டவர்களுக்கு கிரயப் பத்திரம் கிடைக்க
வழிவகுக்கும் என்பதையும் தெரிவித்துக் கொள்கிறேன் என்று தெரிவித்துள்ளார்
