பி.இ கலந்தாய்வு முடிவதற்குள் காலி செய்த வங்கிகள் -அண்ணா பல்கலைக்கழக வளாகத்தில்:

பி.இ., படிப்பில் சேர வரும் மாணவ, மாணவியருக்கு, கடன் கொடுப்பதற்காக, அண்ணா பல்கலை வளாகத்தில், "ஸ்டால்'களை திறந்த பல்வேறு வங்கிகள், கலந்தாய்வு முடிவதற்குள், மூட்டையை கட்டி விட்டன. இதனால், கலந்தாய்வு இடத்தில், வங்கிகளின் சேவையை பெற முடியாமல், மாணவ, மாணவியர் அவதிப்பட்டு

வருகின்றனர்.ஒவ்வொரு ஆண்டும், 10க்கும் மேற்பட்ட பொதுத்துறை வங்கிகள் மற்றும் சில தனியார் வங்கிகளும், அண்ணா பல்கலை வளாகத்தில், "ஸ்டால்'களை அமைக்கின்றன. கலந்தாய்வை முடித்துவிட்டு, கல்விக்கடன் கேட்டு வரும் மாணவர்களுக்கு, உடனடியாக கடன் வழங்காவிட்டாலும், கடன் திட்டங்கள் குறித்த விவரங்களை, வங்கிகள் வழங்குகின்றன. எந்த வங்கியும், மாணவர்களுக்கு, "ஸ்பாட் அனுமதி' வழங்குவது கிடையாது. மாணவர்களின் பெயர், முகவரி, மொபைல் எண் உள்ளிட்ட விவரங்களை பெற்றுக்கொண்டு, குறிப்பிட்ட கிளைக்கு செல்லுமாறு, வங்கி பணியாளர்கள் கூறி விடுகின்றனர். அதன்பின், சம்பந்தப்பட்ட வங்கி கிளைக்கு சென்று, கடன் பெறுவதற்குள், மாணவர்களுக்கு, போதும், போதும் என்றாகி விடும்.இந்த ஆண்டும், ஸ்டேட் வங்கி, இந்தியன் வங்கி உள்ளிட்ட, 10க்கும் மேற்பட்ட வங்கிகள், "ஸ்டால்'களை அமைத்திருந்தன. தற்போது, கரூர் வைஸ்யா வங்கி(கே.வி.பி.,), எச்.டி.எப்.சி., மற்றும் கனரா வங்கி, "ஸ்டால்'கள் மட்டுமே உள்ளன; மற்ற வங்கிகளின், "ஸ்டால்'கள் மூடப்பட்டுள்ளன. கே.வி.பி., பணியாளர் மணி கூறுகையில், ""தினமும், ஏராளமான மாணவர், கடன் கேட்டு, விசாரிக்கின்றனர். அவர்களுக்கு, உரிய விவரங்களை வழங்கி, மாணவர் இருப்பிடத்திற்கு அருகில் உள்ள வங்கி கிளையை அணுகுமாறு தெரிவிக்கிறோம்,'' என்றார்தற்போது, மூன்று வங்கிகள் மட்டுமே இருப்பதால், மற்ற வங்கிகளின் கடன் சேவை குறித்த விவரங்களை, மாணவர்களால் அறிந்து கொள்ள முடியாத நிலை உள்ளது. அனைத்து வங்கிகளின் சேவையும், பல்கலை வளாகத்தில் கிடைத்தால், அனைத்து வங்கிகளிலும் விசாரித்து, எந்த வங்கியில் கடன் வாங்கலாம் என்பது குறித்து, பெற்றோரால், ஒரு முடிவுக்கு வர முடியும். ஆனால், கலந்தாய்வு முடிய ஒரு மாதம் இருக்கும் நிலையில், வங்கிகள் மூட்டையை கட்டியதால், மாணவர்களும், பெற்றோரும் ஏமாற்றம் அடைந்துள்ளனர்.வங்கிகள், மாணவ சமுதாயத்தினருக்கு, சிறந்த சேவையை வழங்கி வருகின்றன. உயர்கல்வி பயிலும் மாணவர்களுக்கு, அதிகளவில் கடன் வழங்கி வருகின்றன' என்று, வங்கிகளுக்கு, நிதி அமைச்சர் சிதம்பரம், பாராட்டு பத்திரம் வாசிக்க தவறுவதில்லை. ஆனால், அமைச்சரின் கருத்துக்கு எதிராக, கலந்தாய்வு முடிவதற்கு முன்பே, பல்வேறு பொதுத் துறை வங்கிகள், மூட்டையை கட்டி, சேவையை முடித்துக் கொண்டது ஏன் என, தெரியவில்லை.