பிளஸ் 2 இயற்பியல் தேர்வு: பிட் அடித்த 30 பேர் சிக்கினர்:

பிளஸ் 2 தேர்வுகள் கடந்த 3ம் தேதி தொடங்கின. மொழிப்பாடங்களுக்கான தேர்வுகள் 7ம் தேதியுடன் முடிந்தன. இதையடுத்து நேற்று இயற்பியல், பொருளாதார பாடங்களுக்கான தேர்வுகள் நடந்தன. பொறியியல் படிப்புக்கு இயற்பியல் பாடத் தேர்வில் பெறும் மதிப்பெண்களையும் கணக்கில் எடுத்துக் கொள்வதால் இந்த தேர்வு மாணவர்களிடையே பெரும் எதிர்பார்ப்பை ஏற்படுத்தியது.
கேள்விகள் அனைத்தும் முந்தைய ஆண்டுகளில் அடிக்கடி கேட்கப்பட்ட கேள்விகளாகவே இருந்தன. குறிப்பாக பெற்றோர் ஆசிரியர் கழகம் அச்சிட்டு வழங்கிய வினா வங்கியில் இருந்தே பெரும்பாலான கேள்விகள் இடம் பெற்று இருந்தன. இதனால் தேர்வு எழுதிய மாணவ, மாணவியர் உற்சாகம் அடைந்தனர். குழப்பமில்லாத நேரடியான கேள்விகளே இடம் பெற்றிருந்தன. குறிப்பாக 10 மதிப்பெண் கேள்விகள் ஏதும் மாணவர்களை பயமுறுத்தவில்லை. கட்டாய கேள்வியும் எளிதாக இருந்ததாக மாணவர்கள் தெரிவித்தனர். இருப்பினும் சராசரி மதிப்பெண் பெறும் மாணவர்களுக்கு ஒரு மதிப்பெண் கேள்வியில் 4, 5, 6, 7 எண் கேள்விகள் கடினமாக இருந்தன. 5 மதிப்பெண் கேள்விகளில் சில மட்டும் கடினமாக இருந்தன. 

கேள்வித்தாள் எளிதாக இருந்ததால் இந்த ஆண்டு செண்டம் எடுக்கும் மாணவர்களின் எண்ணிக்கை கணிசமாக அதிகரிக்கும் என்று இயற்பியல் பாட ஆசிரியர்கள் கருத்து தெரிவித்துள்ளனர். அதேபோல பொருளியல் பாடத் தேர்வில் இடம் பெற்ற கேள்விகளும் எளிதாக இருந்ததாக மாணவர்கள் தெரிவித்தனர். இந்நிலையில், நேற்று நடந்த இரு தேர்வுகளிலும் பறக்கும் படை, தேர்வு மையத்தில் தங்கி இருக்கும் கண்காணிப்பாளர்கள், அண்ணா பல்கலைக் கழக பறக்கும் படையினர் என 3 விதமான சோதனைக் குழுக்கள் ஒவ்வொரு தேர்வு மையத்திலும் அதிரடி சோதனை நடத்தினர். இந்நிலையில், பொருளாதார பாடத்தில் நாகப்பட்டினம்1, நெல்லை 1, அரியலூர் 2, காஞ்சிபுரம் 1,  திருவண்ணாமலை 1, வேலூர் 1, சென்னை 13, விழுப்புரம் 1, கரூர் 2 என 23 பேரும், இயற்பியல் தேர்வில் நெல்லை 2, திருவண்ணாமலை 1, விழுப்புரம் 3, கரூர் 1 என மொத்தம் 7 பேரும் பிட் அடித்ததாக பறக்கும் படையிடம் சிக்கியுள்ளனர். அவர்கள் மீது உரிய நடவடிக்கை எடுக்க அந்தந்த மையத்தின் கண்காணிப்பாளர்கள் தேர்வுத் துறைக்கு பரிந்துரை செய்துள்ளனர்.