பிஎப் கணக்குகள் மேம்பாடு தாம்பரம் மண்டலம் சாதனை:

தாம்பரம் மண்டல வருங்கால வைப்பு நிதி அலுவலகத்தின் மண்டல ஆணையர் மதியழகன் நேற்று வெளியிட்டுள்ள செய்திக் குறிப்பு:தாம்பரம் மண்டல அலுவலகத்தில் உள்ள  வாடிக்கையாளர்களின் கணக்குகள் நிலுவைகள் நீக்கி புதிய நிதியாண்டு ஏப்.1ம் தேதி தொடங்குவதற்குள் மேம்படுத்தி குறிப்பிடத்தகுந்த சாதனையை நிகழ்த்தியுள்ளது. அதன்மூலம் ஏப்.1ம் தேதியே கடந்த நிதியாண்டுக்கான இருப்புகளை முழுமையாக பார்த்து அறியலாம். 2014-15 நிதியாண்டுக்கான கணக்குகளில் 99 சதவீதம்  செப்.30ம் தேதிக்குள் மேம்படுத்தப்பட்டு விட்டன. தாம்பரம் மண்டல அலுவலகம்  ஏப்.1ம் தேதி வரை 24,52,558 கணக்குகளை மேம்படுத்தியது (இதே நாளில் அகில இந்திய  அளவில் 15,54,20,749 கணக்குகள் மேம்படுத்தப்பட்டுள்ளன). இவற்றில் 11,04,203 கணக்குகளுக்கு இப்போது தொடர்ந்து சந்தா கட்டப்பட்டு வருகின்றன. மேலும் 12,52,768 கணக்குகள் பயன்பாட்டில் இல்லை.

இவை தவிர எஞ்சிய 95,587 கணக்குகள் சந்தாரர்களின் வேண்டுகோளின்படி 2014-15 நிதியாண்டில் முடித்து வைக்கப்பட்டுள்ளன. இப்படி தொகுக்கப்பட்டுள்ள பயன்பாட்டில் உள்ள, பயன்பாட்டில் இல்லாத கணக்களின் நிலைமைகளை சந்தாதாரர்கள் அறியலாம். வருங்கால வைப்பு நிதி சந்தாதாரர்கள்  தங்கள் கணக்கு எண்ணை(யுஏஎன்)  http://uanmembers.epfoservices.in என்ற இணைய தளம் மூலமாக மீண்டும் செயலாக்கி கொள்ள வேண்டியது அவசியம்.  எஸ்எம்எஸ் சேவையை பயன்படுத்தவும் பதிவு செய்துக் கொள்ளலாம். இதன் மூலம் மாதந்தோறும் செலுத்தும் சந்தா,  இருப்பு உள்ளிட்ட விவரங்களை நீங்கள் பதிவு செய்யும் செல்போன் எண்ணுக்கு அனுப்பும் எஸ்எம்எஸ் மூலம் அறியலாம். இணையதளம் மூலமாக பரிமாற்றங்கள்  செய்ய வசதியாக மின்னணு கையெழுத்து சான்றிதழ் கட்டாயம் தேவை என  50 தொழிலாளிகளுக்கு ஆலோசனை வழங்கப்பட்டுள்ளன. இந்த சேவையை சம்பந்தப்பட்டவர்களின் வீட்டிற்கே சென்று வழங்கப்படுகின்றன.