துணை மருத்துவ படிப்புகள்: கலந்தாய்வு நாளை நிறைவு:

துணை மருத்துவப் படிப்புகளுக்கான கலந்தாய்வு வியாழக்கிழமை (ஆகஸ்ட் 27) நிறைவடைகிறது. பி.எஸ்சி. செவிலியர், இயன்முறை மருத்துவம், பி.பார்ம், பி.எஸ்சி. ஆப்டோமெட்ரி, ஆக்குபேஷனல் தெரபி, கார்டியாக் பல்மனரி பெர்ஃப்யூஷன், ரேடியாலஜி- இமேஜிங் டெக்னாலஜி, ரேடியோதெரபி, பிஏஎஸ்எல்பி ஆகிய 9 படிப்புகளுக்கான கலந்தாய்வு ஆகஸ்ட் 17-ஆம் தேதி முதல் நடைபெற்று வருகிறது. இதில் 555 அரசு இடங்களும் நிரம்பின. தனியார் கல்லூரிகளில் அரசு ஒதுக்கீட்டு இடங்களுக்கான கலந்தாய்வு தொடர்ந்து நடைபெற்று வருகிறது. செவ்வாய்க்கிழமை நடைபெற்ற கலந்தாய்வின் முடிவில் 497 இடங்கள் நிரம்பின. பி.எஸ்சி. நர்சிங்- 2,666, பி.பார்ம்- 270, இயன்முறை மருத்துவம் -284, ஆக்குபேஷனல் தெரபி- 27 என மொத்தம் 3,247 இடங்கள் காலியாக உள்ளன. இந்தப் படிப்புகளுக்கான கலந்தாய்வு வியாழக்கிழமையுடன் நிறைவு பெறுவதாக தேர்வுக் குழு அதிகாரிகள் தெரிவித்தனர்.