பணியிடமாறுதல் கலந்தாய்வை உடனடியாக நடத்த வலியுறுத்தி, அரசுக் கல்லூரிப்
பேராசிரியர்கள் தமிழகம் முழுவதும் செவ்வாய்க்கிழமை கவன ஈர்ப்பு
ஆர்ப்பாட்டத்தை நடத்தினர்.இதுகுறித்து அரசுக் கல்லூரி ஆசிரியர்கள் கழகத் தலைவர் வெங்கடாசலம் கூறியது: இடமாறுதல்
கலந்தாய்வு நடத்தப்படாததால் பல்வேறு சிக்கல்களை அரசுக் கல்லூரிப்
பேராசிரியர்கள் சந்தித்து வருகின்றனர். கலந்தாய்வு நடத்தாமலே, தங்களுக்கு
வேண்டிய சிலருக்கு மட்டும் மறைமுகமாக இடமாறுதலை அதிகாரிகள் வழங்குவதாக
புகார்கள் எழுகின்றன.
எனவே, அரசின் கவனத்தை ஈர்க்கும் வகையிலும்,
வகுப்புகள் பாதிக்கப்படாத வகையிலும், செவ்வாய்க்கிழமை தமிழகம் முழுவதும்
அரசுக் கல்லூரிகளில் ஆர்ப்பாட்டம் நடத்தபட்டது. கல்லூரி தொடங்கும் முன்னரும், மதிய இடைவேளைக்குப் பின்னரும், கல்லூரி முடிந்த பின்னரும், செவ்வாய்க்கிழமை அரசுக் கல்லூரிகளில் நடத்தப்பட்ட ஆர்ப்பாட்டங்களில் ஏராளமான பேராசிரியர்கள் கலந்து கொண்டனர்.
"கல்லூரிப் பேராசிரியர் இடமாறுதல் கலந்தாய்வை உடனடியாக நடத்த வேண்டும், கலந்தாய்வு இன்றி செய்யப்படும் இடமாறுதல்களை உடனடியாக நிறுத்த வேண்டும்.
கல்லூரிக் கல்வி இயக்குநர், மண்டல இணை இயக்குநர் பதவிகளுக்கு பணி மூப்பு அடிப்படையிலேயே நியனமங்கள் செய்யப்பட வேண்டும்.
2011-ஆம் ஆண்டு பணியமர்த்தப்பட்ட பேராசிரியர்களை உடனடியாக பணி வரன்முறைப் படுத்த வேண்டும்' என்பன உள்ளிட்ட பல்வேறு கோரிக்கைகள் ஆர்ப்பாட்டத்தில் வலியுறுத்தப்பட்டன.
தொடர்ந்து, அரசின் கவனத்தை ஈர்ப்பதற்கான அடுத்தகட்ட நடவடிக்கைகள் குறித்து சென்னையில் திங்கள்கிழமை (செப்டம்பர் 14) சங்கத்தின் ஆட்சிக் குழு கூடி முடிவெடுக்கும் என்றார்.
