Register need to bye dal...tn government:

தமிழக அரசு சார்பில், கிலோ, 110 ரூபாய் என, நவ., 1 முதல் விற்பனை செய்யப்பட உள்ள துவரம் பருப்புக்கான முன்பதிவு துவங்கியுள்ளது. ' ஒருவருக்கு அதிகபட்சமாக, இரண்டு கிலோ மட்டும் வழங்கப்படும்' என, அறிவிக்கப்பட்டுள்ளது.
தமிழகம் உட்பட, நாடு தழுவிய அளவில், துவரம் பருப்பு விலை உயர்ந்துள்ளது; இதனால், பொது மக்கள் பாதிக்கப்பட்டு உள்ளனர். ஓட்டல்களில் உணவு பொருட்கள் விலையும் உயர்ந்துள்ளது. தமிழக அரசு விடுத்த கோரிக்கையை அடுத்து, மத்திய அரசு, தமிழகத்திற்கு, 500 டன் துவரம் பருப்பு ஒதுக்கீடு செய்துள்ளது. இந்த பருப்பு, பாக்கெட்டுகளில் அடைக்கப்பட்டு, அரைகிலோ, 55 ரூபாய்; ஒரு கிலோ, 110 ரூபாய் என, தமிழ்நாடு நுகர்பொருள் வாணிப கழகத்தின், 20அமுதம் அங்காடிகள்; 71 கூட்டுறவு அங்காடிகளில், நவ., 1 முதல் விற்கப்பட உள்ளது.

தற்போது, கூட்டுறவு மற்றும் அமுதம் அங்காடிகளில், துவரம் பருப்பு விற்பனைக்கான முன்பதிவு துவங்கியுள்ளது.இதுகுறித்து, கூட்டுறவு மற்றும் உணவு துறை அதிகாரி ஒருவர் கூறியதாவது:அமுதம், கூட்டுறவு அங்காடிகளில், தினமும், 75 - 100 கிலோ துவரம் பருப்பு விற்பனையாகிறது. நவ., 1 முதல், குறைந்த விலையில், துவரம் பருப்பு விற்கும் போது, பலரும் வாங்க வருவர். அப்போது, கூட்ட நெரிசல் ஏற்படக் கூடாது என்பதால், பருப்பு வாங்க விரும்புவோரின் முகவரி, தொலைபேசி எண் பெற்று, முன்பதிவு செய்யப்படுகிறது. ஒருவருக்கு அதிகபட்சம், இரண்டு கிலோ மட்டும் வழங்கப்படும். தினமும், ஒரு கடைக்கு, 500 - 1,000 கிலோ பருப்பு விற்பனைக்கு அனுப்பப்படும். இவ்வாறு அவர் கூறினார்.