வாக்காளர் பட்டியலில் இருந்து 6.46 லட்சம் பேர் நீக்கம்: ராஜேஷ் லக்கானி தகவல்:

வாக்காளர் பட்டியலில் இருந்து 6.46 லட்சம் பேரை நீக்க முடிவு செய்யப்பட்டுள்ளது என தமிழக தலைமைத் தேர்தல் அதிகாரி ராஜேஷ் லக்கானி தெரிவித்தார்.
 இந்தப் பட்டியலை செம்மைப்படுத்தும் பணி பிப். 15-இல் தொடங்கியது. திங்கள்கிழமையுடன் முடிவடைகிறது. இந்தப் பணி நிறைவடைந்தவுடன், அரசியல் கட்சிகளின் வாக்குச் சாவடி முகவர்களுடன் ஆலோசனை நடத்தப்பட்டு, நீக்கப்பட்டவர்களின் பெயர்களுக்கு ஒப்புதல் பெறப்படுகிறது.

 இந்த நிலையில், பெயர்கள் அனுமதியின்றி நீக்கப்பட்டிருந்தால் மீண்டும் சேர்த்துகொள்ளலாம் என்று தேர்தல் ஆணையம் ஏற்கெனவே அறிவித்துள்ளது.இதுகுறித்து சென்னையில் அவர் ஞாயிற்றுக்கிழமை செய்தியாளர்களிடம் கூறியதாவது:இறந்தோர் 2,84,483 பேரும், ஒன்றுக்கு மேற்பட்ட இடங்கள் பெயர்கள் கொண்ட 2.58 லட்சம் பேரும், ஒரே வாக்காளர் எண் கொண்ட 7,500 பேரும், பெயர் நீக்க படிவம் 7-ஐ அளித்த 97 ஆயிரம் பேரின் பெயர்களும் என இதுவரை 6,46,983 பேரின் பெயர்களை நீக்க முடிவு செய்யப்பட்டுள்ளன.
 பெயர் நீக்க படிவம் 7-ஐ அதிகளவு இருந்தால், எண்ணிக்கை மேலும் அதிகரிக்கும் என்றார்.
 தேர்தல் அறிவிப்பு எப்போது?: சட்டப் பேரவைத் தேர்தலுக்கான அறிவிப்பு, மார்ச் முதல் வாரத்தில், அதாவது 3 அல்லது 4 ஆகிய தேதிகளில் அறிவிக்கப்படலாம் என்று அரசுத் துறை வட்டாரங்கள் தெரிவிக்கின்றன.
 இதற்கேற்ற வகையில் அரசுத் துறைகளின் அனைத்துப் பணிகளையும் மார்ச் 1-ஆம் தேதிக்குள் முடிக்க அறிவுறுத்தப்பட்டுள்ளதாக தலைமைச் செயலக அதிகாரிகள் தெரிவித்தனர்.