What is the future scope of BSc in agriculture? TIPS MR.SUDHAKAR

வேளாண்மை படிப்புகள் விதவிதமா வேலைவாய்ப்பு : உறுதி கொடுக்கிறார் சுதாகர்

வேளாண் பட்டப் படிப்புகள் முடித்தவுடன் நல்ல சம்பளத்தில் வேலை வாய்ப்பு கிடைக்கும்,'' என தமிழ்நாடு வேளாண் பல்கலை மாணவர் சேர்க்கை ஆலோசகர் சுதாகர் தெரிவித்தார்.
தினமலர் 'வழிகாட்டி' நிகழ்ச்சி யில் 'வேளாண்மை படிப்புகள் எதிர்காலம்' குறித்து அவர் பேசியதாவது: பெருகி வரும் மக்கள் தொகைக்கு ஏற்ப உணவு அளிக்கும் முக்கிய பங்கு, வேளாண் துறைக்கு உண்டு. இத்துறையின் வளர்ச்சி என்பது இந்தியா போன்ற நாடுகளுக்கு மிக முக்கியம். இத்துறையில் அறிவியல் மற்றும் தொழில்நுட்ப படிப்புகள் உள்ளன. பிளஸ் 2வில் கணிதம், உயிரியல் படித்தவர்கள் விண்ணப்பிக்கலாம். 'ஆன்லைனில்' மட்டுமே விண்ணப்பிக்க வேண்டும்.நான்கு ஆண்டுகள் படிக்க வேண்டும். பி.எஸ்சி., வேளாண்மை, தோட்டக்கலை உட்பட 13 வகை படிப்புகள் உள்ளன. உயிரியல் மற்றும் தாவரவியல் படித்தவர்கள் 10 வகை பி.டெக்., படிப்புகளில் சேரலாம்.

இப்படிப்பு முடித்தவர்கள் அரசு வேளாண் துறை, தோட்டக்கலை துறை, வங்கி அலுவலர் பதவி மற்றும் போட்டித் தேர்வுகளுக்கு தயாராகலாம்.இப்படிப்புகளை கோவை, மதுரை, திருச்சி, நெல்லை, கும்மிடிபூண்டி உட்பட வேளாண் பல்கலை மற்றும் கல்லுாரிகள் வழங்குகின்றன. தேனி மாவட்டம் பெரியகுளம், திருச்சியில் தோட்டக்கலைத் துறை படிப்புகளும் உள்ளன. பி.டெக்., பயோ டெக்னாலஜி, பயோ இன்பர்மேட்டிக்ஸ், செரிகல்சர், அக்ரி இன்ஜினியரிங், சுற்றுச்சூழலியல், உயிர் தகவலியல், உணவு பதப்படுத்துதல் போன்ற படிப்புகளுக்கு நல்ல எதிர்காலம் உள்ளது.அதே போல் ஐ.எப்.எஸ்., பாடத்திட்டம் அடங்கிய பி.எஸ்சி., வனவியல் படிப்பையும் மாணவர்கள் தேர்வு செய்யலாம். கோவை வேளாண் மற்றும் கனடா பல்கலை இணைந்து நான்கரை ஆண்டுகளில் இரட்டை பட்டப் படிப்புகளை வழங்குகின்றன. கோவை வேளாண் பல்கலையின் 126 மாணவர்கள் ஐ.எப்.எஸ்., அதிகாரிகளாக தேர்வு பெற்றுள்ளனர். வேலைவாய்ப்பை பெறுவதற்கான திட்டமிட்டு படிக்க வேண்டும்.

இவ்வாறு அவர் பேசினார்.