உறுப்பு கல்லூரி முதல்வர் நியமனம் : அண்ணா பல்கலையில் விதிகள் மாற்றம்:

அண்ணா பல்கலையின், உறுப்பு கல்லுாரிகளுக்கு முதல்வர்களை நியமிக்கும் விதிகளில், மாற்றம் ஏற்படுத்தப்பட்டுள்ளது. இந்த பதவிகளை பெற, பல லட்சம் ரூபாய் பேரம் பேசுவதாக, புகார்கள் எழுந்து உள்ளன.அண்ணா பல்கலை நிர்வாகத்தில், ஆறு மாதங்களாக குளறுபடிகள் தொடர்கின்றன. கர்நாடகாவை சேர்ந்த பேராசிரியர், சுரப்பா, துணை வேந்தராக நியமிக்கப்பட்ட பின், முறைகேடுகள் களையப்படும் என, கல்வியாளர்களும், இன்ஜினியரிங் கல்லுாரிகளும் நம்பின. ஆனால், துணை வேந்தருக்கு தமிழ் தெரியாத காரணத்தால், பல்கலை நிர்வாகத்தில், ஒரு தரப்பினர் ஆதிக்கம் இருப்பதாக குற்றச்சாட்டுகள் எழுந்துள்ளன.

பல்கலைக்கு எதிராக போராடிய அமைப்பினருக்கு, பதவி உயர்வு வழங்கப்பட்ட பின், அவர்களின் நடவடிக்கைகள் குறைந்துள்ளன. அதனால், தற்போது உயர் கல்வி துறை மற்றும் அண்ணா பல்கலையின் ஒரு தரப்பு அதிகாரிகள் இணைந்து, ரகசிய கூட்டமைப்பாக செயல்பட துவங்கியுள்ளனர்.சமீபத்தில், மாணவர் சேர்க்கை அறிவிப்பில், பொறுப்பு பதிவாளர் என குறிப்பிடாமல், பதிவாளர் என குறிப்பிட்டது, சர்ச்சையை ஏற்படுத்தி உள்ளது.அதேபோல, சமீபத்தில் நடந்த செமஸ்டர் தேர்வில், கணித தேர்வில் வினாத்தாள், 'லீக்' ஆனது. 'எலக்ட்ரானிக்ஸ் அண்ட் கம்யூனிகேஷன்' துறையில், பழைய வினாத்தாளை மாற்றி வழங்கி, குளறுபடி நடந்தது. இந்த பிரச்னைகள் குறித்து, விசாரணை நடந்து வருகிறது.இந்நிலையில், புதிய பிரச்னை தலைதுாக்கியுள்ளது. அதாவது, அண்ணா பல்கலையின் கட்டுப்பாட்டில் இயங்கும், 13 உறுப்பு கல்லுாரிகளுக்கும், 'டீன்' எனப்படும், முதல்வர் நியமனம் தொடர்பான விதிகளில், திடீர் மாற்றம் செய்யப்பட்டுள்ளது.இதுவரை, அந்தந்த கல்லுாரிகளில் உள்ள, சீனியர் பேராசிரியர்களே, முதல்வராக நியமிக்கப்பட்டு வந்தனர். தற்போது, அண்ணா பல்கலையின், சென்னை கிண்டி இன்ஜி., கல்லுாரி,குரோம்பேட்டை, எம்.ஐ.டி., மற்றும் அழகப்பா செட்டியார் தொழில்நுட்ப கல்லுாரியின் பேராசிரியர்களை, முதல்வர்களாக நியமிக்க முடிவு செய்யப்பட்டுள்ளது.இவர்களிடம் விண்ணப்பங்களை, அண்ணா பல்கலை நிர்வாகம் பெற்றுள்ளது. இதில், முதல்வர் பதவிக்கான பட்டியலில் இடம்பெற, கடும் போட்டி நிலவுகிறது. இடைத்தரகர்கள் வாயிலாக, 20 லட்சம் ரூபாய் வரை பேரம் பேசுவதாகவும் கூறப்படுகிறது.ஏற்கனவே, பேராசிரியர் நியமனத்திற்கு லஞ்சம்; விடைத்தாள் மறுமதிப்பீடுக்கு லஞ்சம் பெற்றது தொடர்பாக, லஞ்ச ஒழிப்பு துறை விசாரணை நடந்து வருவது குறிப்பிடத்தக்கது.