வீடு கிடைக்காதவருக்கு வட்டியுடன் இழப்பீடு:

குறிப்பிட்ட காலத்திற்குள், வீட்டை ஒப்படைக்காத கட்டுமான நிறுவனம், பாதிக்கப்பட்டவரிடம் பெற்ற பணத்தை, வட்டியுடன் திருப்பி தருவதோடு, 10 ஆயிரம் ரூபாய் இழப்பீடும் தர வேண்டும்' என, ரியல் எஸ்டேட் ஒழுங்குமுறை ஆணையம் உத்தரவிட்டுள்ளது.
காஞ்சிபுரம் மாவட்டம், செங்கல்பட்டு தாலுகாவில் உள்ள, கழிபட்டூர் கிராமத்தில், 'நீல் கமல்' என்ற பெயரில், தனியார் நிறுவனம் குடியிருப்பு கட்டி வருகிறது. இதில், 48.29 லட்சம் ரூபாய்க்கு வீடு வாங்க, ஸ்ரீதர் என்பவர் ஒப்பந்தம் செய்து இருந்தார். இதற்காக, 39.44 லட்சம் ரூபாய் செலுத்தி உள்ளார்.ஒப்பந்தப்படி, 2015 டிசம்பர் இறுதியில், வீடு ஒப்படைக்கப்பட்டு இருக்க வேண்டும். ஆனால், குறிப்பிட்ட காலத்தில் வீடு ஒப்படைக்கப்படவில்லை என, ரியல் எஸ்டேட் ஆணையத்தில், ஸ்ரீதர் மனு செய்தார்.

இந்த மனு தொடர்பாக, விசாரணை அதிகாரி சரவணன் பிறப்பித்த உத்தரவு:இரு தரப்பு கருத்துகள், ஆவணங்களை ஆராய்ந்ததில், இழப்பீடு பெற மனுதாரருக்கு உரிமை உள்ளது. எனவே, அவர் செலுத்திய தொகையை, வட்டியுடன் கட்டுமான நிறுவனம், திரும்ப வழங்க வேண்டும்.வழக்கு செலவு தொகையாக, 10 ஆயிரம் ரூபாய் அளிக்க வேண்டும். மேலும், கட்டுமான நிறுவனத்துடன் மேற்கொள்ளப்பட்ட ஒப்பந்தத்தை ரத்து செய்ய, மனுதாரர் உரிய நடவடிக்கை எடுக்கலாம்.இவ்வாறு, உத்தரவில் கூறப்பட்டுள்ளது.