நேர்காணலுக்கு
வருமாறு கைப்பேசியில் அழைப்பு வந்துள்ளதா? ஒரு நிமிடம் கூட தாமதிக்காமல்
,இந்த நேர்காணலில் வெற்றி பெற்று பணியில் சேர்வதற்கான பணிகளை துவக்குங்கள்.
< நேர்காணலுக்கு செல்வதற்கு முன் தயாராகிக்கொள்ள வேண்டிய 6 விஷயங்கள்
நிறுவனத்தை பற்றி ஆராயுங்கள்
முதலில் அந்த நிறுவனத்தைப் பற்றி அறிந்து கொள்ளுங்கள்.அந்த நிறுவனரை பற்றிய மதீப்பீடுகளை Jobbuzz போன்ற இணையதளங்களில் பாருங்கள்.அந்த நிறுவனத்தின் இணையதளம் மற்றும் அந்த நிறுவனத்தின் சமூக வலைதளப் பக்கங்களை பார்த்து அந்த நிறுவனம் எப்படிப்பட்டது என்று தெரிந்துகொள்ளுங்கள். இவை அந்த நிறுவனத்தில் வேலை கிடைத்தால் வேலைக்கு செல்லலாமா வேண்டாமா என்று முடிவு செய்து கொள்ள உதவியாக இருக்கும்.
பணி சார்ந்த கடமைகளை பற்றி தெரிந்து கொள்ளுங்கள்
<அந்த நிறுவனம் பற்றி ஆராய்ந்து அவர்கள் நடத்தும் நேர்காணலுக்கு செல்லலாம் என்று முடிவெடுத்துவிட்ட பின்னர் அந்த நிறுவனத்தின் மனிதவள மேம்பாட்டு துறையினர் அனுப்பும் வேலை பற்றிய விவரங்களை படித்துப் பாருங்கள்.அப்பொழுது தான் அந்த நிறுவனத்தினர் என்னென்ன தகுதிகளை எதிர்பார்க்கிறார்கள் என்று தெரியும். உங்களிடம் அந்த வேலைக்குரிய தகுதிகள் இருக்கிறதா என்று ஆராய முடியும்.அப்படி ஆராய்வதின் மூலம் உங்களுடைய நிறை குறைகளை தெரிந்து கொள்வீர்கள்.பிறகு நேர்காணலில் 'நாங்கள் ஏன் உங்களை வேலைக்கு சேர்த்துக்கொள்ள வேண்டும்?' என்று அவர்கள் கேட்கும் போது உங்களுடைய நிறைகளைப் பற்றி எடுத்துக்கூறி 'அந்த வேலையை திறம்பட செய்வதற்கான தகுதி என்னிடம் இருக்கிறது 'என்று பதிலளிக்க முடியும்.அதே போல 'நீங்கள் எப்படி இந்த நிறுவனத்திற்கு மதிப்பை பெற்று தருவீர்கள்?' என்ற கேள்விக்கு ' ஒருவேளை நான் இந்த நிறுவனத்தில் பணிபுரிய தேர்ந்தெடுக்கப்பட்டால்,நான் இந்த நிறுவனத்தின் பிரதிநிதியாக பார்க்கப்படுவேன். எனவே இங்குள்ள தொழில் சார்ந்த கலாச்சாரத்தை தொழில் சார்ந்த நிகழ்ச்சிகளுக்கு செல்லும் போது பின்பற்றி நிறுவனத்திற்கு நன்மதிப்பை சேர்ப்பேன்' என்று பதலளிக்க முடியும்.
வேலைக்கு தகுந்த ஊதியம்
<ஆங்கிலத்தில் 'competitive salary ' என்று கூற கேட்டிருப்போம். அதாவது அந்தந்த வேலைக்குரிய ஊதியம் இதுவே என்று அந்த துறை சார்ந்த நிறுவனங்கள் நிர்ணயித்திருப்பார்கள். அதே ஊதியத்தை தான் இவர்களும் வழங்குவார்களா அல்லது இந்த நிறுவனத்தினர் அதிகமாக வழங்குவார்களா என்று நேர்காணலுக்கு செல்லும் முன் தெரிந்து கொள்ளுங்கள். இதில் தவறொன்றுமில்லை. இதன்மூலம் நீங்கள் வேலைக்கு தேர்வு செய்யப்பட்டால் கிடைக்கப் போகும் ஊதியத்தை அறிந்து கொள்ளலாம்.
உங்களை பற்றிய தற்குறிப்பை கவனமாக தயாரியுங்கள்
தற்குறிப்பில் உங்களது செயல்திறன்களை பட்டியலிடலாம். எடுத்துக்காட்டாக 'நான் இவற்றை கற்றுள்ளேன். எனவே இது தொடர்பான திட்டங்களில் என்னால் பணியாற்ற முடியும்' என்று குறிப்பிடலாம்.உங்கள் சாதனைகளை பட்டியலிடலாம்.எடுத்துக்காட்டாக ' நான் இந்த திட்டத்தில் ஏற்பட்ட பிரச்சினைக்கு இந்த தீர்வை யோசித்து அதை செயல்படுத்தி முடித்தேன்.
இதனால் திட்டத்திற்கான செலவுகள் அதிகரிக்காமல் தடுத்து நிறுத்தப்பட்டது 'என்று குறிப்பிடலாம்.உங்களுக்கு எந்த துறை பொருத்தமாக இருக்கும் என்று குறிப்பிடலாம்.எடுத்துக்காட்டாக ' எனக்கு ஆராய்ச்சியில் ஆர்வம் அதிகம்.இதைப்பற்றி ஆராய்ச்சி செய்து கொண்டிருக்கிறேன்.அதில் இன்னின்ன முன்னேற்றம் ஏற்பட்டுள்ளது' என்று குறிப்பிடலாம்.நீங்கள் உங்களை பற்றி சுய அறிமுகம் செய்து கொள்ளும் போது நீங்கள் செய்த சாதனைகளை கூறுங்கள் மற்றும் தற்குறிப்பிலும் குறிப்பிடவும். அதற்கு ஆதாரமாக தற்குறிப்புடன் சேர்த்து சான்றிதழ்களையும் அவர்களின் பார்வைக்கு வையுங்கள்.இது உங்களின் மீதான நம்பகத்தன்மையை அதிகரிக்கும்.
தெளிவான பதில்கள் அளிக்க கற்றுக்கொள்ளுங்கள்
<நேர்காணலுக்கு செல்லும் முன் பல 'மாதிரி நேர்காணல்களை' உங்கள் நண்பர்கள், உறவினர்கள் அல்லது உடன் வேலை செய்பவர்களை நடத்த சொல்லி கேள்விகளுக்கு சரியாக விடையளித்து பழகுங்கள். 'மாதிரி நேர்காணல்களுக்கான' உங்கள் துறை சார்ந்த கேள்விகளை இணையதளத்தில் இருந்து எடுத்து அவர்களிடம் கொடுத்து கேட்க சொல்லுங்கள். நீங்களும் அந்த கேள்விகளுக்கு எவ்வாறு விடையளிக்க வேண்டும் என்று பயிற்சி எடுத்துவிட்டு பதிலை வழங்குகள். வழக்கமாக 'உங்களை பற்றி சொல்லுங்கள்' என்பது தான் முதல் கேள்வியாக இருக்கும். அதற்கு மனப்பாடம் செய்து ஒப்பிக்காதீர்கள்.உங்களுக்கு நெருங்கியவர்களிடம் உங்களது நல்ல மற்றும் தீய குணங்களை கேட்டு அறியுங்கள். நீங்களும் உங்களின் நல்ல மற்றும் தீய குணங்களை பட்டியலிடுங்கள்.இரண்டையும் ஆராய்ந்து உங்களுடைய நிறை குறைகளை தெரிந்து கொள்ளுங்கள்.
இது ஏன் முக்கியம் என்றால் உங்களை பற்றி சொல்லும் போது நிறைய நல்ல குணங்களை மனப்பாடம் செய்து ஒப்பிக்கலாம். ஆனால் நேர்காணலில் 'ஒரு குழந்தை தேர்வில் இன்னொருவரை பார்த்து பதில் எழுதினால் என்ன செய்வீர்கள்' என்று கேட்பார்கள். அந்த கேள்விக்கு நீங்கள் சொல்லும் பதிலையும் முன்னாள் உங்களைப் பற்றி நீங்கள் கூறிய குணங்களையும் ஒப்பிட்டு பார்த்து உங்கள் பதிலின் உண்மைத்தன்மையை ஆராய்ந்து தேர்வு செய்யலாமா வேண்டாமா என்றும் முடிவெடுப்பார்கள்.எனவே உங்களை பற்றி முழுமையாக ஆராய்ந்து உணர்ந்து கொள்ளுங்கள்.அதே போல உங்களுக்கு பிடித்த பாடம் பற்றி சொல்லும் போது அதைப் பற்றி தெளிவாக கற்றுக்கொண்டிருக்கிறீர்களா என்று யோசித்து விட்டு பேசுங்கள். ஏனெனில் அந்த பாடம் தொடர்பான கேள்விகள் கேட்கும் போது திணற கூடாது.இவ்வாறு நீங்கள் பயிற்சி எடுப்பதால் தன்னம்பிக்கை ஏற்படும்.பதட்டம் குறைந்து மனஅமைதியுடன் நேர்காணலை அணுகுவீர்கள்.
கேள்வி கேட்பதற்கு தயாராகுங்கள்
நேர்காணல் செய்பவர் நேர்காணலின் இறுதியில் 'உங்களுக்கு எதாவது கேள்வி கேட்க வேண்டுமா' என்று கேட்க வாய்ப்புகள் உண்டு.நீங்கள் அந்த நிறுவனத்தைப் பற்றி அல்லது எந்த வேலைக்கு விண்ணப்பித்தோமோ அந்த வேலையைப் பற்றி எதாவது சந்தேகம் இருந்தால் அது தொடர்பாக கேள்வி எழுப்புங்கள்.அந்த நிறுவனத்தை பற்றி தெரிந்து கொள்ள மறைமுக கேள்விகள் கேட்கலாம்.எடுத்துக்காட்டுக்கு
-
<'நீங்கள் நிறுவனத்தில் சேரும் போது எப்படி உணர்ந்தீர்கள்? இப்பொழுது எப்படி உணர்கிறீர்கள்?' -இங்கே அவர் நிறுவனத்தில் சேரும் போது இருந்த மனநிலை மற்றும் இப்பொழுது அங்கேயே சில காலம் வேலை செய்த பிறகு இருக்கும் மனநிலை என்ன என்று தெரிய வரும். - 'உங்களுக்கு நீங்கள் செய்த வேலைக்காக கிடைத்த மிகப்பெரிய அங்கீகாரம் மற்றும் மிகப்பெரிய பாராட்டைப் பற்றி கூறுங்கள்' - இதன்மூலம் அந்த நிறுவனம் திறமைக்கு மதிப்பு கொடுக்கிறதா , எல்லோரும் மனம் திறந்து பாராட்டுகிறார்களா என்று தெரிந்து கொள்ளலாம்.
- 'உங்களுடைய எந்த சிறப்பான யோசனையை நிறுவனத்தினர் செயல்முறைப்படுத்தினர்?' -இதன்மூலம் உங்களின் யோசனைகள் சிறந்ததாக இருப்பின் நிறுவனம் அதனை செயல்படுத்துமா என்று தெரிந்து கொள்ளலாம்.
- 'இந்த நிறுவனத்தில் உங்களை மிகவும் கவர்ந்த நபர் யார்? ஏன்? ' -இதன்மூலம் அந்த நிறுவனத்திலுள்ள உயரதிகாரியின் போக்கு பற்றி தெரிந்து கொள்ளலாம்.
- 'உங்கள் தனிப்பட்ட வாழ்க்கை மற்றும் தொழில் வாழ்க்கை என இரண்டும் ஒன்றை ஒன்று பாதிக்காதவாறு எவ்வாறு சமாளிக்கிறீர்கள்?'-இதன்மூலம் நீங்கள் வேலைக்கு சேர்ந்தாலும் குடும்ப பொறுப்புகளுக்கு நேரம் ஒதுக்க முடியுமா என்று தெரிந்து கொள்ளலாம்.
< இன்னொரு விஷயம் என்னவென்றால் அவர் கேட்க சொன்னார் என்பதற்காக ஏற்கனவே தெரிந்த ஒரு விஷயத்தை பற்றி கேள்வி எழுப்பாதீர்கள்.
இப்படி உங்களை தயார்படுத்திக் கொண்டாலே நேர்காணலில் எந்த பதட்டமும் இல்லாமல் பதிலளிக்க முடியும். பிடித்த வேலையில் அமரவும் முடியும். நேர்காணலுக்கு செல்லும் அனைவருக்கும் இப்பொழுதே வாழ்த்துக்களை தெரிவித்துக் கொள்கிறோம்.
