அடிக்கடி உணவில் சேர்க்கும் கீரைகளில் முக்கியமானது முருங்கைக்கீரை. இது கூந்தலின் வளர்ச்சிக்கும் மாயாஜலம் செய்யும்.
வீட்டுக்கொரு மரம் வளர்ப்போம் என்று இப்போது போன்ற விழிப்புணர்வு இல்லாத காலம் அது. எல்லோருடைய வீட்டிலும் தோட்டத்திலும் கண்டிப்பாக இருக்கும் மரங்களில் முருங்கை முக்கியமானது. முருங்கை இல்லாத வீடுகளை விரல் விட்டு எண்ணிவிடலாம்.
ஒரே மரத்தில் கீரைகள், பூக்கள், காய்கள், காய்களினுள் இருக்கும் விதைகள், இலைகளின் காம்புகள் என எல்லாமே நிறைவாக கிடைப்பதால் முருங்கைக்கு தனி மகத்துவம் உண்டு. இப்போது நோய்களுக்காக மாத்திரைகளை நம்பியிருக்கிறோம். ஆனால் முருங்கை நோய்களை தீர்ப்பதிலும் அருமருந்தாக செயல்படுகிறது.
முருங்கை கூந்தல் பிரச்சனை கொண்டிருப்பவர்களுக்கு அற்புதமான பலன்கள் தருகிறது என்றால் உங்களால் நம்பமுடிகிறதா? முருங்கை இலையை கொண்டு உங்கள் முடி பிரச்சனையை தீர்த்துவிட முடியும். அப்படியான குறிப்பு ஒன்றைதான் இப்போது பார்க்க போகிறோம்.
கூந்தல் பிரச்சனை
குழந்தைகள் முதல் பெரியவர்கள் வரை அனைவரும் கூந்தல் பிரச்சனையை கொண்டிருக்கிறார்கள். கூந்தல் பொலிவின்மை, முடி உதிர்வு, கூந்தல் நுனி பிளவு, முடி வளர்ச்சி குறைவு, இளநரை, செம்பட்டை நிறம் , எண்ணெய் பிசுக்கு, பொடுகு என பலவிதமான பிரச்சனைகளை கூந்தலில் கொண்டிருக்கிறார்கள் பலரும்.
முடி வளர்ச்சிக்கு என்று பிரத்யேகமான விலை உயர்ந்த பொருள்களை பயன்படுத்தினாலும் பராமரிப்பு செய்தாலும் சமயங்களில் அது பலன் தருவதில்லை அதற்கு காரணம் முடி வளர்ச்சிக்கு தேவையான ஊட்டச்சத்து உடலில் குறைவாக இருப்பதுதான்.
இந்த முடி வளர்ச்சியை ஊக்குவிக்க பராமரிப்பு மட்டும் செய்யாமல் முடி வளர்ச்சியின் அனைத்து பிரச்சனைகளையும் தீர்த்திடும் முருங்கை இலை சூப் குறித்து தெரிந்துகொள்ளுங்கள். இது நிச்சயம் உங்கள் முடி பிரச்சனைகளிலிருந்து உங்களை காப்பாற்றும்.
முருங்கை இலை சூப்
முடி பிரச்சனை நீங்கி முடி வளர்ச்சியை ஊக்குவிக்கும் முருங்கை இலை சூப் தயாரிக்கும் முறையை முதலில் பார்க்கலாம்.
தேவை
சுத்தம் செய்து ஆய்ந்த முருங்கை இலை - 1 கப்
வெண்ணெய் - 1 டீஸ்பூன்
சாம்பார் வெங்காயம் - 5
தக்காளி - 1 சிறியது ( தேவையெனில் )
உப்புத்தூள், மிளகுத்தூள் - தேவைக்கு
பாத்திரத்தில் இரண்டு டம்ளர் நீர் விட்டு கொதிக்கவிடவும். தண்ணீர் கொதித்ததும் சுத்தம் செய்த கீரையை சேர்த்து விடவும். அதிக தீ வைக்காமல் மிதமானத்தீயில் வைக்கவும். முருங்கை இலை பக்குவமாக வேக வேண்டும்.
அதிக நேரம் வேக வைத்தால் அது கசப்புத்தன்மையை உண்டாக்கும். அரை வேக்காடாக இருந்தால் வயிற்றுப்போக்கை உண்டாக்கும். 7 முதல் 10 நிமிடங்கள் வரை வைத்து எடுத்தால் போதும்.
இலையின் சாறு நீரில் இறங்கியிருக்கும். அதனால் உடனடியாக வடிகட்ட வேண்டும். இல்லையெனில் சத்து மீண்டும் கீரையினுள் இறங்கிவிடும்.
பிறகு வாணலியில் எண்ணெய் ஒரு டீஸ்பூன் சேர்த்து நறுக்கிய சாம்பார் வெங்காயம், தக்காளி சேர்த்து பச்சை வாசனை போகும் அளவு 2 நிமிடங்கள் மட்டும் வதக்கி எடுக்கவும். பிறகு வடிகட்டிய முருங்கை இலை நீர், வெண்ணெய் இரண்டையும் சேர்த்து கலக்கி வெதுவெதுப்பாக இருக்கும் போது குடித்துவிடவும்.
சுவை நன்றாக இருக்கும். தண்ணீர் குடிப்பது போல் வேக வேகமாக குடிக்காமல் பொறுமையாக குடிக்கவும். தேவையெனில் இலையை சேர்த்தும் குடிக்கலாம்.
எவ்வளவு குடிக்கலாம்
முருங்கை இலை சூப் முடி வளர்ச்சிக்கு உதவக்கூடியது என்பதோடு உடலுக்கும் பல ஆரோக்கியத்தை அள்ளிக்கொடுக்க கூடியது. ஒரு வயது குழந்தை முதல் வயதானவர்கள் வரை அனைவருக்கும் ஏற்றது இந்த சூப். குழந்தைகளுக்கு கொடுக்கும் போது வெங்காயம் தக்காளி தவிர்த்து மிளகுத்தூள், உப்புத்தூள் சேர்த்து கொடுக்கலாம்.
தினமும் ஒரு டம்ளர் இதை இளவயதினர் குடித்துவந்தால் உடலில் ஊட்டச்சத்து பற்றாக்குறை பெருமளவு இருக்காது.கூந்தல் வளர்ச்சிக்காக முருங்கை இலை சூப் குடிப்பவர்கள் தினமும் ஒரு டம்ளர் தவறாமல் குடித்து வரலாம்.
காஃபி, டீ தவிர்த்து தொடர்ந்து 3 மாதங்கள் வரை இதை குடித்து வந்தால் முடி பிரச்சனை நீங்கி முடி வளர்ச்சி வேகமாக இருப்பதை உணர முடியும். அதோடு பொலிவாகவும் பளபளப்பாகவும் வளரும் முடி உங்களை ஆச்சரியப்படுத்தும்.
முருங்கை இலை கூந்தல் வளர்ச்சிக்கு எப்படி உதவுகிறது
முருங்கை இலை இரும்புச்சத்து உள்ளடக்கியுள்ளது. இது மயிர்க்கால்களின் வேர்களுக்கு இரும்புச்சத்து குறைபாடு இல்லாமல் பாதுகாக்க செய்கிறது. முடி வளர்ச்சிக்கு இரும்புச்சத்து நிறைவாக இருக்க வேண்டும். இரும்புச்சத்து நிறைவாக இருக்கும் போது ரத்தத்தில் ஆக்ஸிஜனானது உச்சந்தலையில் வேகமாக கொண்டு சேர்க்க உதவுகிறது. இதனால் மயிர்க்கால்கள் ஊக்குவிக்கிறது.
முருங்கை இலையில் துத்தநாகம் முடி வளர்ச்சியை ஊக்குவிக்கிறது. துத்தநாகம் குறையும் போது அது முடி வளர்ச்சியிலும் பாதிப்பை உண்டாக்கும்.முருங்கை இலையில் உள்ள துத்தநாகம் சேதமடைந்த மயிர்கால்களை விரைவாக மீட்க செய்கிறது.
நரம்புக்கும், மூளைக்கும் வலு சேர்க்கும் சிறந்த மூலிகை நீர்பிரம்மி !
முருங்கை இலையில் உள்ள அத்தியாவசிய அமினோ அமிலங்கள் ஆரோக்கியமானவை. முடி வளர்ச்சிக்கு தேவையான ஆர்ஜூனைன், சிஸ்டைன், லைசின், மெத்தியோனைன் போன்றவை முருங்கை இலையில் உள்ளது.
முருங்கையில் இருக்கும் வைட்டமின் சி மற்றும் இ ஆனது முடி நிறத்தை மாற்றக்கூடும் ஃப்ரீ ரேடிக்கல்களை கட்டுப்படுத்தி முடி பலவீனத்தையும், நிறத்தையும் மாற்றாமல் தடுக்கிறது. தாவர அடிப்படையில் முருங்கை இலையும் ஒமேகா - 3கொழுப்பு அமிலங்களை கொண்டுள்ளது. இது மெலிந்த கூந்தலை அடர்த்தியாக்க செய்கிறது.
மேற்கண்ட பலன்கள் பெற வேண்டும் என்றால் எப்போதாவது என்று இல்லாமல் தொடர்ந்து இரண்டு மாதங்களாவது இந்த முருங்கை இலை சூப் குடிப்பது அவசியமானது. அப்போதுதான் பலனும் கிடைக்கும்.
