செந்தமிழ்ச் சொற்பிறப்பியல் அகரமுதலித் திட்ட
இயக்ககத்தில் ஆவண எழுத்தர் உள்பட இரண்டு பணியிடங்களுக்கு விண்ணப்பிக்கலாம்
என்று அந்த இயக்ககம் தெரிவித்துள்ளது. இதுகுறித்து, இயக்ககத்தின் இயக்குநர்
சனிக்கிழமை வெளியிட்ட அறிவிப்பு:
செந்தமிழ்ச் சொற்பிறப்பியல் அகரமுதலித் திட்ட
இயக்ககத்தில் ஆவண எழுத்தர், கணினி தட்டச்சர் ஆகிய பணியிடங்களுக்கு
விண்ணப்பங்கள் வரவேற்கப்படுகின்றன. இந்தப் பணியிடங்களுக்கு அடிப்படை
கல்வித் தகுதி பத்தாம் வகுப்பு தேர்ச்சி பெற்றிருக்க வேண்டும்.
இந்தப் பதவிகளுக்கு விண்ணப்பிக்க அதிகபட்ச வயது வரம்பு
35 (தாழ்த்தப்பட்ட-பழங்குடியினருக்கு) ஆகும். பிற்படுத்தப்பட்ட-மிகவும்
பிற்படுத்தப்பட்டோருக்கு 32 ஆகவும், இதர வகுப்பினருக்கு 30 ஆகவும் வயது
வரம்பு நிர்ணயிக்கப்பட்டுள்ளது.
தகுதி உள்ளவர்கள் வெள்ளைத்தாளில் பாஸ்போர்ட் அளவிலான
புகைப்படத்தை ஒட்டி, பெயர், முகவரி, பிறந்த நாள், மதம், இனம், கல்வித்
தகுதி, முன்னுரிமை கோருவதற்கான சான்று ஆகிய விவரங்களைக் குறிப்பிட
வேண்டும். மேலும், தேவையான சான்றிதழ்களின் நகல்களைச் சுயசான்றொப்பத்துடன்
இணைத்து அக்டோபர் 6-ஆம் தேதிக்குள் அனுப்ப வேண்டும்.
விண்ணப்பத்தை, நேரிலோ அல்லது பதிவு அஞ்சலிலோ,
"இயக்குநர் (முழுக் கூடுதல் பொறுப்பு), செந்தமிழ்ச் சொற்பிறப்பியல்
அகரமுதலித் திட்ட இயக்ககம், சி-48, தமிழ்நாடு வீட்டுவசதி வாரிய அலுவலக
வளாகம், 2-வது நிழற்சாலை, அண்ணாநகர், சென்னை-40' என்ற முகவரிக்கு அனுப்பி
வைக்க வேண்டும். மேலும், விவரங்களை 044-26215023 என்ற தொலைபேசி எண்ணில்
தொடர்பு கொள்ளலாம்.
