பெங்களூரு:அரசு தொடக்க மற்றும் உயர்நிலைப் பள்ளிகளில், தசரா விடுமுறை எண்ணிக்கை
இம்முறை குறைக்கப்பட்டுள்ளது.பொதுவாக, ஒரு கல்வி ஆண்டில், 220 நாட்கள் வரை,
பள்ளிகளில் வேலை நாட்களாக இருக்கும். ஆனால், 2015 - 16ம் கல்வி ஆண்டில்,
பள்ளி வேலை நாட்களை, 240 ஆக அரசு உயர்த்தியது.பாடத்திட்டம் மாற்றம்கடந்த
சில ஆண்டுகளாக, தொடக்க மற்றும் உயர்நிலைப் பள்ளி பாடத்திட்டங்கள்
படிப்படியாக மாற்றப்பட்டு வருகின்றன. பாடத்தில் மாணவர்கள் தொடர்ந்து கவனம்
செலுத்துவதற்காக, விடுமுறை நாட்கள் குறைக்கப்பட்டுள்ளன. அதுமட்டுமின்றி,
எதிர் வரும் கோடை கால விடுமுறை நாட்களின் எண்ணிக்கையையும் குறைக்க, கல்வி
துறை தீர்மானித்துள்ளது.ஆண்டுதோறும், மே, 29ல் பள்ளிகள் துவங்கினால்,
அக்டோபர் மாத துவக்கத்தில், அரையாண்டு தேர்வு முடிந்து, அக்டோபர், 2ம் தேதி
காந்தி ஜெயந்தியில் இருந்து, 28ம் தேதி வரை இடைக்கால விடுமுறை
அளிக்கப்படும். தசரா விடுமுறை என்ற பெயரில், 26 நாட்கள் அளிக்கப்பட்டது.
இந்த
விடுமுறை இந்தாண்டிலிருந்து, 18 நாட்களாக குறைக்கப்பட்டுள்ளது. அக்.,
11லிருந்து, 28ம் தேதி வரை மட்டும் இடைக்கால விடுமுறை
அளிக்கப்பட்டுள்ளது.அரசின் இந்த நடவடிக்கைக்கு தொடக்க மற்றும் உயர்நிலைப்
பள்ளி ஆசிரியர்கள் கடும் அதிருப்தி தெரிவித்துள்ளனர்.தொடக்க மற்றும்
உயர்நிலைப் பள்ளி ஆசிரியர்கள் சங்க தலைவர் மஞ்சுநாத் கூறியதாவது:விடுமுறை நாட்கள் குறைக்கப்படுவதால், ஆசிரியர்கள், மாணவர்கள் இரு தரப்புமே நெருக்கடிக்கு ஆளாகின்றனர். மாணவர்கள் கல்வி கற்பதிலும் பாதிப்பை ஏற்படுத்தும். இருவருக்கும் ஓய்வு அவசியம்.
இதையெல்லாம் விஞ்ஞான ரீதியில் ஆய்வு செய்து தான், முன்பிலிருந்தே குறிப்பிட்ட நாட்கள் வரை, இடைக்கால மற்றும் கோடை கால விடுமுறை அளிக்கப்படுகிறது.அரசு ஊழியர்களா?ஆசிரியர்கள் தற்போது அரசு ஊழியர்களின் பட்டியலில்சேருகின்றனர்.அவர்களின் விடுமுறையை பறித்து கொள்வதால், எங்களையும், 'நான் வெகேஷனல்' பட்டியலில் சேர்த்து கொள்ளட்டும். ஆண்டுமுழுவதும் நாங்களும் வேலை செய்கிறோம்.மற்றவர்களுக்கு தருவதை போன்று, விடுமுறைகள், இரண்டாவது சனிக்கிழமை
விடுமுறைகள் கிடைக்கும்.இவ்வாறு அவர் கொந்தளித்தார்.
சுமையாக கருதாதீர்!
மாநில கல்வித்துறை பொது வழிமுறை கமிஷனர் சத்யமூர்த்தி கூறியதாவது:
முதல் வகுப்பிலிருந்து, 10ம் வகுப்பு வரை மாற்றப்பட்டுள்ள பாட நடைமுறைகளை ஆய்வு செய்த பின்னரே, பள்ளி வேலை நாட்கள் அதிகரிக்கப்பட்டுள்ளது. கல்வித் தரத்தை உயர்த்தவும், கல்வி நடைமுறையை அபிவிருத்தி செய்யவும் இந்த மாற்றத்தை, அரசு கொண்டு வந்துள்ளது. இதற்கு ஆசிரியர்கள் ஒத்துழைக்க வேண்டும்.
முந்தைய பாடத்திட்டங்களில் சுற்றுச்சூழல் அறிவியல், கணினி கல்வி, சுற்றுலா போன்றவை கிடையாது. தற்போது பெரும்பாலான பாடங்கள் சேர்க்கப்பட்டுள்ளன. உலகளவிலான போட்டிகளை சமாளிக்க, கர்நாடகா மாணவர்கள், குறிப்பாக அரசு பள்ளி மாணவர்களை தயாராக்க வேண்டும். இதற்காகவே, பள்ளி வேலை நாட்கள் அதிகரிக்கப்பட்டுள்ளன.
மாணவர்களுக்கு மொழி அறிவை மட்டும் ஏற்படுத்தினால் போதாது; அவர்களுக்கு பல முக்கியமான விஷயங்களையும் கற்றுத்தர வேண்டும். இதற்காக, ஆசிரியர்கள் தங்களின் நேரத்தை, மாணவர்களுக்காக அதிகம் ஒதுக்க வேண்டியிருக்கும். மாணவர்களுடன் ஆசிரியர்களும் கூட புதிது புதிதாக கற்றுக்கொள்ள வேண்டும். கற்பிக்கும் பணியை,
ஆசிரியர்கள் சுமையாக கருதக்கூடாது.
இவ்வாறு அவர் கூறினார்.
