இந்திய மருத்துவ முறை படிப்பு கலந்தாய்வு: 2-வது நாளில் 322 பேருக்கு சேர்க்கைக் கடிதம்:
சித்த மருத்துவம் உள்ளிட்ட இந்திய மருத்துவ முறை படிப்புகளில் மாணவர்
சேர்க்கைக்காக, 2-வது நாளாக திங்கள்கிழமை நடைபெற்ற கலந்தாய்வில் 322
பேருக்கு சேர்க்கைக் கடிதம் வழங்கப்பட்டது. கலந்தாய்வின் முடிவில் அரசுக்
கல்லூரியில் 14 இடங்கள் உள்பட மொத்தம் 469 காலியிடங்கள் உள்ளன.இந்திய
மருத்துவ முறை படிப்புகளுக்கான கலந்தாய்வு சென்னையில் அக்டோபர் 25-ஆம் தேதி
தொடங்கியது. அரசு மருத்துவக் கல்லூரிகளில் 356, சுயநிதி கல்லூரிகளில் அரசு
ஒதுக்கீட்டு இடங்கள் 743 என மொத்தம் 1,099 இடங்களுக்கு கலந்தாய்வு
நடைபெற்று வருகிறது. சென்னை அரும்பாக்கத்தில் உள்ள இந்திய மருத்துவ
முறை- ஹோமியோபதி ஆணையர் அலுவலக வளாகத்தில் கலந்தாய்வு நடைபெறுகிறது. முதல்
நாள் கலந்தாய்வின் முடிவில் 308 பேருக்கு சேர்க்கைக் கடிதம் வழங்கப்பட்டது.
அரசு
சித்த, ஹோமியோபதி கல்லூரிகளில் அனைத்து இடங்களும் நிரம்பின: இந்த
நிலையில், இரண்டாம் நாளான திங்கள்கிழமை நடைபெற்ற கலந்தாய்வுக்கு 949 பேர்
அழைக்கப்பட்டிருந்தனர்.
அதில், 380 பேர் பங்கேற்றனர். முடிவில் அரசு
சித்த மருத்துவக் கல்லூரிகள், அரசு ஹோமியோபதி கல்லூரியில் உள்ள அனைத்து
இடங்களும் நிரம்பின. கன்னியாகுமரி மாவட்டம் கோட்டாறில் உள்ள அரசு
ஆயுர்வேதக் கல்லூரி 1, சென்னை அரும்பாக்கம் அரசு யோகா- இயற்கை மருத்துவக்
கல்லூரி 1, யுனானி அரசு மருத்துவக் கல்லூரியில் 12 என மொத்தம் 14 அரசு
இடங்கள் காலியாக உள்ளன.
சுயநிதி கல்லூரிகளில் உள்ள மொத்த அரசு
ஒதுக்கீட்டு இடங்கள் 743-இல், இதுவரை 288 இடங்கள் நிரம்பியுள்ளன. மீதம் 455
இடங்கள் காலியாக உள்ளன.
1,561 பேருக்கு இன்று அழைப்பு: காலியாக உள்ள
இடங்களுக்கு அக்டோபர் 28-ஆம் தேதி வரை தொடர்ந்து கலந்தாய்வு நடைபெறும்.
கட்-ஆஃப் மதிப்பெண் 173.73 முதல் 154 வரையுள்ள மாணவர்களுக்கு
செவ்வாய்க்கிழமை (அக். 27) கலந்தாய்வு நடைபெறும். மொத்தம் 1,561 மாணவர்கள்
கலந்தாய்வுக்கு அழைக்கப்பட்டுள்ளனர் என தேர்வுக் குழு அதிகாரிகள்
தெரிவித்தனர்.
