ஆசிரியர்கள் வேலை நிறுத்தம் செய்தபோதிலும் தமிழ்நாடு முழுவதும் அனைத்து
அரசு பள்ளிகளும் திறந்து இருந்தன என்றும் பணிக்கு 30 சதவீதத்தினர் வரவில்லை
என்றும் பள்ளிக்கல்வி இயக்குனர் ச.கண்ணப்பன் தெரிவித்தார்.
வேலை நிறுத்தம்
தமிழ்நாடு ஆசிரியர்கள் கூட்டு நடவடிக்கை குழுவினர் (ஜாக்டோ)
சார்பில் பழைய பென்சன் திட்டத்தை அமல்படுத்தவேண்டும் என்பது உள்பட 15 அம்ச
கோரிக்கைகளை வலியுறுத்தி கடந்த 3 நாட்களாக போராட்டம் நடத்தி வருகிறார்கள்.
பள்ளிக்கூடங்களில் உள்ள ஆசிரியர்கள் நேற்று வேலை நிறுத்தம் செய்வார்கள்
என்று ஜாக்டோ நிறுவனம் ஏற்கனவே அறிவித்து இருந்தது.
வேலை நிறுத்தம்
காரணமாக தமிழ்நாடு முழுவதும் அரசு மற்றும் அரசு உதவிபெறும்
தொடக்கப்பள்ளிகள், நடுநிலைப்பள்ளிகள், உயர்நிலைப்பள்ளிகள்,
மேல்நிலைப்பள்ளிகளில் வழக்கத்தை விட குறைந்த எண்ணிக்கையில் ஆசிரியர்கள்
வந்து இருந்தனர்.
பள்ளிகள் திறந்து இருந்தன
ஆசிரியர்கள் வேலை நிறுத்தத்தில் ஈடுபட்டால், அந்த பள்ளிகள்
திறக்காமல் போய்விடும் என்று எண்ணி முன்கூட்டியே அந்த பள்ளியின் சத்துணவு
அமைப்பாளர்கள், அங்கன்வாடி ஊழியர்கள், வட்டார வள மைய பயிற்றுனர்கள் ஆகியோரை
கொண்டு பள்ளிகளை திறக்க பள்ளிக்கல்வி இயக்குனரகம், தொடக்கப்பள்ளி
இயக்குனரகம் ஆகியவை ஏற்பாடு செய்திருந்தன.
இதன்காரணமாக தமிழ்நாடு
முழுவதும் அனைத்து பள்ளிகளும் திறந்து இருந்தன என்று பள்ளிக்கல்வி
இயக்குனர் ச.கண்ணப்பன் தெரிவித்தார். அவர் மேலும் கூறியதாவது:–
30 சதவீதத்தினர் வரவில்லை
அரசு மற்றும் அரசு உதவி பெறும் உயர்நிலை மற்றும்
மேல்நிலைப்பள்ளிகளில் 1 லட்சத்து 43 ஆயிரத்து 538 ஆசிரியர்கள் வேலை
பார்க்கிறார்கள். நேற்று 19 ஆயிரத்து 749 பேர் பணிக்கு வரவில்லை. 1
லட்சத்து 23 ஆயிரத்து 789 பேர் வேலை பார்த்தனர். வராத ஆசிரியர்கள் 13
சதவீதம்.
அரசு மற்றும் அரசு உதவி பெறும் தொடக்கப்பள்ளிகள், நடுநிலைப்பள்ளிகளில் 1 லட்சத்து 46 ஆயிரத்து 912 பேர் பணிபுரிகிறார்கள்.
நேற்று நடந்த வேலை நிறுத்தத்தில் 75ஆயிரத்து 626 ஆசிரியர்கள் வேலைக்கு
வரவில்லை. இது 51 சதவீதம் ஆகும். மொத்தத்தில் 30 சதவீதம் ஆசிரியர்கள்
வரவில்லை.
இவ்வாறு கண்ணப்பன் கூறினார்.
