அரசு பொருள்காட்சியைக் காண வரும் பார்வையாளர்களின் எண்ணிக்கையை
அதிகரிப்பதற்காக, பெண்களுக்கான சமையல் உள்ளிட்ட போட்டிகளை நடத்த சுற்றுலாத்
துறை திட்டமிட்டுள்ளது. சென்னை தீவுத்திடலில் அரசின் சாதனைகளை
விளக்கும் வகையில் ஆண்டுதோறும் பொருள்காட்சி நடத்தப்பட்டு வருகிறது.
நிகழாண்டிலும் 42-ஆவது சுற்றுலாத் துறை தொழில் பொருள்காட்சி கடந்த மாதம்
12-ஆம் தேதி தொடங்கியது. இந்த மாத இறுதி வரையில் இந்தப் பொருள்காட்சி
நடைபெறவிருக்கிறது.
இந்தப் பொருள்காட்சி திடலில் தமிழ்நாடு அரசுத்
துறை சார்பில் 29 அரங்குகளும், அரசுத் துறை நிறுவனங்கள் சார்பில் 13
அரங்குகளும் அமைக்கப்பட்டுள்ளன. ஒரே இடத்தில் அரசின் அனைத்துத் துறை
தகவல்களும் இடம் பெற்றுள்ளதாலும், பல்வேறு பொழுதுபோக்கு அம்சங்களும் இடம்
பெற்றுள்ளதாலும் இதைக் காண பொதுமக்கள் ஏராளமானோர் ஆர்வத்துடன் வந்து
செல்கின்றனர். இதுகுறித்து, பொருள்காட்சி திடலில் உணவகம் நடத்தும்
ஒருவர் கூறியதாவது: கடந்தாண்டு பொருள்காட்சி முன்னதாகவே தொடங்கியது.
அதனால், பொதுமக்கள் கூட்டமும் அதிகம் இருந்தது. அதனால், வியாபாரமும் நன்றாக
இருந்தது. ஆனால், இந்த ஆண்டு பொருள்காட்சியை குறிப்பிட்ட நாளில் தொடங்கவில்லை. தாமதமாகவே தொடங்கியது. இதுபோன்ற காரணத்தால் பொதுமக்களின் எண்ணிக்கை குறைந்துள்ளதால் வியாபாரம் மந்தமாகவே இருக்கிறது. அதனால், பார்வையாளர்களின் வருகையை அதிகரிப்பதற்கு நடவடிக்கை எடுக்க வேண்டும் என்றார் அவர்.
இதுகுறித்து சுற்றுலாத் துறை அதிகாரி ஒருவர் கூறிதாவது:
எப்போதுமே ஜனவரி முதல் வாரத்தில் பொருள்காட்சி தொடங்கும். இந்த ஆண்டில் மழை போன்ற காரணங்களால் பொருள்காட்சி தாமதமாகவே தொடங்கப்பட்டது. இதனால், அரங்குகள், கடைகள் அமைப்பதிலும் தாமதம் ஏற்பட்டது. எப்போதுமே தொடங்கிய 15 நாள்களில் பொதுமக்கள் அதிகம் வருவதால் வசூலும் அதிகமாக இருக்கும். விடுமுறை நாள்களில் பார்வையாளர்கள் அதிகமாக வருவர். இந்தப் பொருள்காட்சி தொடங்கிய 32 நாள்களில் இதுவரை 5.85 லட்சம் பேர் பார்வையிட்டுள்ளனர். இதன்மூலம், ரூ.1.18 கோடி வருவாயும் கிடைத்துள்ளது. கடந்தாண்டு இதே நாள்களில் 6.25 லட்சம் பேர் பார்வையிட்டனர்.
வரும் நாள்களில் பொருள்காட்சிக்கு பார்வையாளர்களை அதிகளவில் ஈர்ப்பதற்காக, பெண்களுக்கான சமையல், கோலப் போட்டிகள் நடத்துவதற்கு ஏற்பாடுகள் செய்யப்பட்டுள்ளன. இதேபோல, நாள்தோறும் பார்வையாளர்களுக்கு குலுக்கல் முறையில் வழங்கும் பரிசுகளின் எண்ணிக்கையை உயர்த்தவும் திட்டமிடப்பட்டுள்ளது என்றார் அவர்.
