தாய் மொழியில் துவக்க கல்வி அளிக்கும் விஷயத்தில், பிரதமர் தலையிட்டு,
சட்டத்திருத்தம் கொண்டு வர வேண்டும்,” என, முதல்வர் சித்தராமையா
வலியுறுத்தினார்.பெங்களூரு, கன்டீரவா விளையாட்டு அரங்கில் நேற்று நடந்த
'கன்னட ராஜ்யோத்சவா மற்றும் குழந்தைகள் மேளா - 2016' விழாவில், முதல்வர்
சித்தராமையா பேசியதாவது:கர்நாடக அரசு, 1994ம் ஆண்டிலேயே 'கன்னட மொழி கல்வி
கொள்கை'யை அமல்படுத்தியது. இதன்படி, தாய் மொழியிலேயே துவக்க கல்வி
அளிக்கப்பட வேண்டும் என்பது அரசின் எண்ணம்.ஆனால், அரசு நிதியுதவி பெறாத
பள்ளிகள், அதை எதிர்த்து நீதிமன்றத்தில் வழக்கு தொடர்ந்தன. சட்ட
போராட்டத்தில் அரசுக்கு பின்னடைவு ஏற்பட்டது.இது தொடர்பாக, 2014ல்
தீர்ப்பளித்த உச்ச நீதிமன்றம், எந்த மொழியில் கல்வி கற்க வேண்டுமென்று
முடிவு செய்யும் விஷயத்தை, பெற்றோரிடம் விட்டுவிடும்படி தீர்ப்பளித்தது.
இதற்கு எதிர்ப்பு தெரிவித்து, மேல்முறையீடு செய்தும் வெற்றி
கிடைக்கவில்லை.இரண்டு முறை பிரதமருக்கு கடிதம் எழுதினேன். அனைத்து மாநில
முதல்வர்களுக்கும் கடிதம் எழுதி, மத்திய அரசுக்கும், பிரதமருக்கும்
நெருக்கடி கொடுக்கும்படி ஆலோசனை கூறினேன். உச்ச நீதிமன்ற தீர்ப்பை மாற்ற
வேண்டும் என்றால், அரசியல் சட்ட திருத்தம் அவசியம். பிரதமர், அனைத்து மாநில
முதல்வர்களுடன் கூட்டம் நடத்தி முடிவெடுக்க வேண்டும்.துவக்க கல்வியை
அந்தந்த மாநில மொழியிலேயே அளிக்க வேண்டும். இல்லையென்றால், தாய் மொழிக்கு
பாதிப்பு வரும் என்று கல்வி, மொழி வல்லுனர்கள் கருத்து தெரிவித்துள்ளனர்.
துவக்கத்திலிருந்தே மாநில மொழியிலேயே கல்வி அளிக்க வேண்டும் என்று
வலியுறுத்தி வந்தேன்; இப்போதும் வலியுறுத்துகிறேன்.மொழி அடிப்படையில்
கர்நாடகம் பிரிக்கப்பட்டு, 61 ஆண்டுகளாகின்றன. 1947ல் சுதந்திரம்
கிடைத்திருந்தாலும், மொழி அடிப்படையில் மாநிலங்கள் பிரிக்கப்பட்டது, 1956
நவம்பர், 1ம் தேதி தான். இதற்காக பலர் தியாகம் செய்துள்ளனர்.கர்நாடக
மாநிலத்துக்காக போராடியவர்களின் கனவை நனவாக்குவது நம் கடமை. மண், மொழி,
நீருக்காக போராடுவோம் என்று உறுதி மொழி எடுத்துக்கொள்ள வேண்டும். காவிரி
விஷயத்தில், மாநில நலனுக்காக பணியாற்ற வேண்டும். பதவி நிரந்தரமல்ல; நிலம்,
நீர், மொழி, கலாசார விஷயத்தில் பதவியை பணயம் வைக்க வேண்டியிருக்கும்.காவிரி
விஷயத்தில் சிறப்பு சட்டசபை கூட்டம் நடத்தி, குடிநீர் நோக்கத்துக்கு
அல்லது வேறு நோக்கத்துக்கு காவிரி நீர் திறந்து விடப்படாது, என்று ஒரு
மனதாக தீர்மானம் நிறைவேற்றினோம். இதற்கு எதிர்க்கட்சிகளும், மாநில மக்களும்
ஒத்துழைப்பு தந்தனர். மாநிலத்தின் நன்மை என்று வரும்போது, எந்த
காரணத்துக்காகவும் அரசு பின் வாங்காது. எந்த தியாகத்துக்கும் தயார்.இவ்வாறு
அவர் பேசினார்.சித்தராமையா முன் கோஷம் எழுப்பிய நபர் : கன்னட ராஜ்யோத்சவா விழாவில் முதல்வர் சித்தராமையா பேசிக்கொண்டிருந்த போது, நபர் ஒருவர், “கே.பி.எஸ்.சி., தேர்வில் அநியாயம் நடந்துவிட்டது. நியாயம் பெற்றுத்தாருங்கள்,” என, கோஷம் எழுப்பியதால், பரபரப்பான சூழல் ஏற்பட்டது.பெங்களூரு கண்டீரவா விளையாட்டு அரங்கில் நேற்று காலையில், கன்னட ராஜ்யோத்சவா விழா நடந்தது. இதில் பங்கேற்ற சித்தராமையா பேசி கொண்டிருந்தார். அப்போது ஒரு நபர் எழுந்து நின்று, “கே.பி.எஸ்.சி., தேர்வில் எனக்கு அநியாயம் நேர்ந்து விட்டது; நியாயம் பெற்றுத்தாருங்கள்,” என, கோஷமிட்டார்.அவரை சமாதானப்படுத்திய முதல்வர் சித்தராமையா, “உங்களுக்கு என்ன அநியாயம் நேர்ந்துள்ளது என கூறுங்கள். அதை சரி செய்து, நியாயம் பெற்றுத்தருகிறேன்,” என்றார்.அதற்குள் போலீசார் அங்கு வந்து கோஷமிட்டவரை, கப்பன் பார்க் காவல் நிலையத்துக்கு அழைத்துச் சென்றனர். அந்நபர், ஹூன்சூர் தாலுகா கள்ளஹள்ளி கிராமத்தை சேர்ந்த பரசுராம் என்பது தெரிய வந்தது.கடந்த, 1993ல், கே.பி.எஸ்.சி., தேர்வு எழுதினார். வினாத்தாள் வேறு மொழியில் இருந்தது. கன்னடத்தில் பதில் எழுதியதால், தேர்ச்சி பெறவில்லை. அன்று முதல் பரசுராம், போராட்டம் நடத்தியும், தீர்வு கிடைக்கவில்லை என கூறப்படுகிறது. ஆயிரக்கணக்கானோர் குவிந்திருந்த கண்டீரவா விளையாட்டு அரங்கில், முதல்வர் உரையை இடைமறித்து, 'நியாயம் வேண்டும்' என பரசுராம் கோஷமிட்டு, மேடை அருகே வந்ததால், நிகழ்ச்சியில் சிறிது நேரம் குழப்பம் ஏற்பட்டது.
