சிவில் சர்வீசஸ் தேர்வை தள்ளிவைக்க கோரிக்கை ஜெயலலிதா கடிதத்தின் மீது மத்திய அரசு நடவடிக்கை எடுக்க வேண்டும் பாராளுமன்றத்தில் அ.தி.மு.க. வலியுறுத்தல்:
சிவில் சர்வீசஸ் தேர்வை தள்ளிவைக்க கோரி முதல்–அமைச்சர் ஜெயலலிதா
அனுப்பிய கடிதத்துக்கு மத்திய அரசு நடவடிக்கை எடுக்க வேண்டும் என்று
பாராளுமன்றத்தின் இரு அவைகளிலும் அ.தி.மு.க. வலியுறுத்தியது.
ஜெயலலிதா கடிதம்
சிவில் சர்வீசஸ் தேர்வை தள்ளிவைக்க வேண்டும் என்று தமிழக
முதல்–அமைச்சர் ஜெயலலிதா பிரதமர் நரேந்திர மோடிக்கு கடிதம் எழுதினார். அந்த
கடிதத்தை சுட்டிக்காட்டி அ.தி.மு.க. எம்.பி. டாக்டர் வேணுகோபால் நேற்று
பாராளுமன்றத்தில் கேள்வி நேரத்துக்கு பிறகு இந்த பிரச்சினையை எழுப்பினார்.
அப்போது அவர் பேசியதாவது:–
இந்தியா முழுவதும் யு.பி.எஸ்.சி. நடத்தும்
சிவில் சர்வீசஸ் பணிகளுக்கான தேர்வு வருகிற 18–ந் தேதி முதல் 23–ந் தேதி
வரை நடைபெறும் என்று அறிவிக்கப்பட்டுள்ளது. இந்த தேர்வில் தமிழகத்தில்
இருந்து கலந்துகொள்பவர்களுக்கான தேர்வு மையம் சென்னை மட்டுமே ஆகும்.
தள்ளிவைக்க வேண்டும்
சென்னை மற்றும் அதன் சுற்றுப்பகுதிகளில் கனமழையால் பலத்த சேதம்
ஏற்பட்டு இருக்கிறது. இதனால் இந்த தேர்வில் கலந்து கொள்ளும் மாணவர்கள் மற்ற
ஊர்களில் இருந்து சென்னைக்கு வருவது மிகவும் கடினமானதாக உள்ளது.
இது
தொடர்பாக தமிழக முதல்–அமைச்சர் கடந்த 12–ந் தேதி அன்று பிரதமருக்கு
எழுதியுள்ள கடிதத்தில், இந்த தேர்வில் கலந்துகொள்பவர்கள் தங்களை தயார்
செய்து கொள்ள தேவையான அவகாசத்தை வழங்கும் வகையில் தேர்வை தள்ளி வைக்குமாறு
கோரிக்கை விடுத்துள்ளார். எனவே தமிழக முதல்–அமைச்சரின் வேண்டுகோளின்படி
இந்த தேர்வை குறைந்தது 2 மாதங்களுக்கு தள்ளி வைக்க மத்திய அரசு தேவையான
நடவடிக்கை எடுக்க வேண்டும்.
இவ்வாறு அவர் பேசினார்.
ராஜ்நாத்சிங் பதில்
இதனை தொடர்ந்து துணை சபாநாயகர் மு.தம்பிதுரையும் இதே வேண்டுகோளை
முன்வைத்தார். அப்போது அவர் தமிழக முதல்–அமைச்சர் எழுதிய கடிதம் குறித்து
அரசு எடுக்கப்போகும் நடவடிக்கை பற்றி மத்திய அரசு பதிலளிக்க வேண்டும் என்று
கோரினார்.
இதற்கு அவையில் இருந்த மத்திய உள்துறை மந்திரி
ராஜ்நாத்சிங், தான் இன்னும் அந்த கடிதத்தை படிக்கவில்லை. அதனால் அதில் என்ன
கூறப்பட்டுள்ளது என்பது தனக்கு தெரியாது என்று கூறினார்.
டெல்லி மேல்–சபை
இதே கோரிக்கையை வலியுறுத்தி டெல்லி மேல்–சபையில் அ.தி.மு.க. எம்.பி.
நவநீதகிருஷ்ணன் பேசினார். மேல்–சபை துணைத்தலைவர் பி.ஜே.குரியனும்
அ.தி.மு.க.வின் கோரிக்கைக்கு ஆதரவு தெரிவித்தார்.
இதற்கு பாராளுமன்ற
விவகாரத்துறை ராஜாங்க மந்திரி முக்தர் அப்பாஸ் நக்வி பதில் அளித்து
பேசுகையில், இது தொடர்பாக முடிவு எடுக்க மத்திய மனிதவள மேம்பாட்டு துறை
அமைச்சகத்துக்கு கடிதம் அனுப்பி இருக்கிறோம் என்றார்.
நிவாரண நிதி
முன்னதாக நவநீதகிருஷ்ணன் பேசும்போது, தமிழக வெள்ள நிவாரண நிதிக்கு
எம்.பி.க்கள் தங்கள் பங்களிப்பை அளிக்க வேண்டும் என்று கேட்டுக்கொண்டார்.
அப்போது
பேசிய துணைத்தலைவர் பி.ஜே.குரியன், தான் ஏற்கனவே ரூ.1 கோடி நிவாரண நிதி
அளித்திருப்பதாகவும், மற்ற எம்.பி.க்களும் இதே போல நிதியை அளிக்குமாறு
கேட்டுக்கொண்டுள்ளதாகவும் தெரிவித்தார்.
